अहिले नेपालमा मनसुनी वायु सक्रिय हुँदा देशभरकाे मौसममा बदली भई विभिन्न स्थानमा वर्षा भइरहेको छ । जल तथा मौसम पूर्वानुमान महाशाखाका अनुसार हाल कोशी, बागमती, गण्डकी र लुम्बिनी प्रदेशका धेरैजसो भूभागका साथै कर्णाली र सुदूरपश्चिम प्रदेशका थोरै स्थानहरूमा हल्कादेखि मध्यम र केही क्षेत्रमा भारी वर्षा भइरहेको छ ।
आज दिउँसोदेखि देशभर मनसुनी गतिविधि अझै बढ्ने छ भने कोशी, मधेस, बागमती, गण्डकी, लुम्बिनी र सुदूरपश्चिम प्रदेशका पहाडी तथा तराई दुवै भूभागका थोरै स्थानहरूमा गम्भीर मौसमी अवस्था सिर्जना भएर मेघगर्जन र चट्याङसहित भारीदेखि धेरै भारी वर्षाको सम्भावना रहेकाे महाशाखाले जनाएकाे छ ।
पश्चिमका पहाडी क्षेत्र र पूर्वका तराईका जिल्लाहरूमा लगातारको झरीका कारण जनजीवन प्रभावित हुन सक्नेछ भने यस वर्ष मनसुन सुरु भएदेखि नै देशका विभिन्न भागमा बाढी र पहिरोले क्षति पुर्याउन सुरु गरेकाे छ । त्यस्तै लगातारको भारी वर्षाका कारण पहाडी भूभागमा भूक्षय, गेग्रान बहाव र ठूला तथा साना पहिरोको उच्च जोखिम रहेको छ ।
तराई र सहरी क्षेत्रहरूमा उचित निकासको अभावका कारण डुबानको खतरा बढेको छ भने वर्षाका कारण देशका प्रमुख नदीहरू, सहायक नदी, मध्यपहाडी क्षेत्रका साना खोला तथा खोल्साहरूमा पानीको सतह खतराको संकेतभन्दा माथि पुग्न सक्ने बाढी पूर्वानुमान महाशाखाले जनाएको छ ।
जसका कारण नदी तटीय क्षेत्रका बासिन्दा, तराईका डुबान क्षेत्रका नागरिक र पहिरोको जोखिम रहेका भिरालो जमिन आसपासका समुदायलाई उच्च सतर्कता अपनाउन आग्रह गरिएको छ ।त्यस्तै यातायात, हवाई उडान, कृषि र पर्यटन क्षेत्र समेत मौसमी प्रतिकूलताका कारण प्रभावित हुन सक्ने भएकाले यात्रा गर्दा मौसमको ताजा अवस्था बुझेर मात्र अघि बढ्न प्रशासनले अनुरोध गरेको छ ।
सम्भावित जाेखिमकाे मध्यनजर गर्दै आपत्कालीन अवस्थाका लागि स्थानीय तह र सुरक्षा निकायहरूलाई समेत उच्च तयारीको अवस्थामा राखिएको महाशाखाले जनाएकाे छ ।
