पहिलोपटक हुम्लाको स्याँडा गाउँमा गाडी पुगेको छ । कर्णाली नदीपारि रहेकाे हुम्लाको सिमकोट गाउँपालिका–८, मा अवस्थित स्याँडा गाउँमा पहिलाे पटक गाडी पुगेकाे हाे ।
गाउँपालिकाले आर्थिक वर्ष २०८२/८३ मा स्याँडा याङ्गु सडक निर्माणमा १ करोड १२ लाख रुपैयाँ बजेट विनियोजन गरेपछि गाउँमै गाडी पुगेको बताइएकाे छ । यसअघि सिमकोटका सातवटै वडामा यातायातका साधन पुगिसकेकाे भएपनि स्याँडा गाउँमा गाडी पुगेको थिएन ।
पहिलोपटक दुर्गम गाउँमा यातायात सेवा पुगेपछि स्थानीयवासी खुसी भएका छन् भने गाउँसम्म गाडी पुगेका दिन स्थानीयले फूलमाला, बाजागाजा र स्वागत कार्यक्रमको आयोजना गरेका थिए ।
स्याँडा सडक सञ्चालनमा आएपछि खाद्यान्न, निर्माण सामग्री, औषधि तथा अन्य अत्यावश्यक वस्तुहरू ढुवानी गर्न सहज हुने भएकाे छ भने गाउँमा गाडी पुगेपछि स्थानीयमा नयाँ आशा जागेको र शिक्षा, स्वास्थ्य, कृषि, पर्यटन तथा व्यापार–व्यवसायका क्षेत्रमा थप सम्भावना सृजना हुने विश्वास गरिएको छ ।
