आगामी आर्थिक वर्ष २०८३/०८४ मा चौरीदेउराली गाउँपालिकाले पूर्वाधार क्षेत्रलाई बलियाे बनाउने नीति लिएको छ । गाउँपालिका अध्यक्ष रेणुका चौलागाईले प्रस्तुत गरेको नीति तथा कार्यक्रममा व्यवस्थित प्रशासनिक भवन निर्माण कार्यलाई तीव्र रूपमा सम्पन्न गर्ने प्रतिबद्धता जनाइएको छ ।
त्यसैगरि स्वास्थ्य क्षेत्रतर्फ गाउँपालिकामा निर्माणाधीन १५ शय्याको अस्पताल भवनको कार्यलाई आगामी आर्थिक वर्षभित्रै सम्पन्न गर्ने, त्यस्तै गाउँपालिकाले नयाँ सडक ट्र्याक खोल्नुभन्दा पुराना र बनिसकेका सडकहरूको स्तरोन्नति (अपग्रेडिङ) गर्ने नीति लिइएको छ ।
जस्मा आगामी आर्थिक वर्ष गाउँपालिका स्तरीय मुख्य ३ वटा सडक आयोजनाहरू गोठपानी-विर्ता देउराली सडक निर्माण, गुम्बाटी-बाङथली सडक निर्माण, देउराली-ज्यामिरे बोक्से सडक निर्माणको लागि बजेट ब्यवस्था गरिने तयारी गरिएको छ ।
त्यसैगरि स्थानीय जनताको अपनत्व बढाउनका लागि उपभोक्ता समिति मार्फत सञ्चालन हुने आयोजनाहरूमा अनिवार्य रूपमा १० प्रतिशत लागत बेहोर्नुपर्ने पुरानो नीतिलाई निरन्तरता दिइएको छ ।
गाउँपालिकाले आफ्ना नागरिकलाई गुणस्तरीय सञ्चार सेवा पुर्याउन नेपाल टेलिकम र अन्य इन्टरनेट सेवा प्रदायक संस्थाहरूसँग सहकार्य गरि सञ्चार सञ्जाल नपुगेका आवश्यक स्थानहरूमा नेपाल टेलिकमको नयाँ टावर जडानका लागि विशेष पहल गरिने बताइएको छ ।
