काभ्रेमा सवारी साधन जाँचका क्रममा ब्राउन सुगरसहित पाँच जना पक्राउ परेका छन् । काभ्रेपलाञ्चोकको रोशी गाउँपालिका-९, मंगलटारस्थित इलाका प्रहरी कार्यालयको प्रहरी चेकपोस्टमा गरिएको सवारी साधन जाँचका क्रममा ब्राउन सुगरसहित पाँच जना पक्राउ परेका हुन् ।
हिजाे साँझ प्रहरी निरीक्षकको कमाण्डमा खटिएको टोलीले चेक जाँचका क्रममा बर्दिबासबाट काठमाडौंतर्फ जाँदै गरेको बागमती प्रदेश ०१-०३४ च ६५९४ नम्बरको इलेक्ट्रिक कार शंकास्पद देखिएपछि जाँच गर्दा उक्त लागू औषध सहित पाँच जना पक्राउ परेका थिए ।
पक्राउ परेका पाँच जनामध्ये दोलखा भीमेश्वर नगरपालिका-७, बस्ने २० वर्षीया रितु जैसीले कम्मरमा बाँधेको ज्याकेटको बायाँ गोजीबाट प्लास्टिकसहित ६०.०६ ग्राम ब्राउन सुगरजस्तो देखिने पदार्थ फेला परेको थियाे । त्यसपछि कारमा सवार पाँचै जनाको लागू औषध तथा मादक पदार्थ सेवन परीक्षण गर्दा सविन कोइराला र जगत् खत्रीको रिपोर्ट पोजेटिभ आएको बताइएकाे छ ।
लागू औषधसहित पक्राउ परेका उनिहरुलाई नियन्त्रणमा लिएर थप अनुसन्धान तथा आवश्यक कारबाहीका लागि जिल्ला प्रहरी कार्यालय काभ्रेपलाञ्चोक पठाइ घटनाबारे थप अनुसन्धान भइरहेको प्रहरीले जनाएकाे छ ।
