नवनियुक्त मुख्यसचिव गोविन्द बहादुर कार्कीले प्रधानमन्त्री तथा मन्त्रिपरिषद्को कार्यालयमा पदबहाली गरेका छन् । गत बुधबार मन्त्रिपरिषद्को बैठकले मुख्यसचिवमा नियुक्त गर्ने निर्णय गरेसँगै कार्कीले आजबाट पदभार ग्रहण गरेका हुन् ।
पदबहाली कार्यक्रम सामान्य र संक्षिप्त रूपमा सम्पन्न गरिएको थियो । प्रधानमन्त्री तथा मन्त्रिपरिषद्को कार्यालयका सीमित कर्मचारीको उपस्थितिमा कुनै विशेष तामझामबिनै नियमित प्रशासनिक प्रक्रियाअनुसार पदबहाली गरिएको हाे ।
कार्कीले पदभार ग्रहणसँगै मुख्यसचिवका रूपमा नेपाल सरकारको प्रशासनिक नेतृत्व सम्हाल्दै सरकारका निर्णय कार्यान्वयन, निजामती प्रशासनको समन्वय तथा प्रशासनिक सुधारका कार्यलाई अघि बढाउनेछन् ।
