एसीसी वुमेन्स यू-१९ प्रिमियर कपमा नेपालले लगातार दोस्रो जित निकाल्दै सिंगापुरलाई १५१ रनले हराएकाे छ । आज मलेसियाको वाईएसडी यूकेएम ओभल मैदानमा सम्पन्न खेलमा नेपाली यू-१९ महिला क्रिकेट टोलीले सिंगापुरमाथि १५१ रनको फराकिलो जित दर्ता गरेको हो।
नेपालले दिएको २०० रनको विशाल लक्ष्य पछ्याएको सिंगापुर निर्धारित २० ओभरमा ८ विकेट गुमाएर मात्र ४८ रनमा समेटिएकाे थियाे । यसअघि टस जितेर पहिले ब्याटिङ गरेको नेपालले निर्धारित २० ओभरमा कुनै पनि विकेट नगुमाई १९९ रनको विशाल योगफल तयार पारेको थियो ।
नेपालका ओपनरद्वय सना प्रविण ९८ र सावित्री धामी ७४ रन बनाएर अविजित रहँदा २०० रनको कठिन लक्ष्य पछ्याएको सिंगापुर सुरुआतदेखि नै नेपाली बलरहरूको कडा बलिङसामु निरिह बनेकाे थियाे । सिङ्गापुरका लागि अङ्किता वर्षा राजले सर्वाधिक १९ रन र ध्वनि प्रकाशले ८ रन बनाउनु बाहेक अन्य कुनै पनि ब्याटरले दोहोरो अङ्क जोड्न सकेनन् । सिङ्गापुरका ३ जना ब्याटर शून्य रनमै आउट भएका थिए ।
नेपालका लागि बलर अनु कडायतले आफ्नो स्पेलको ४ ओभरमा मात्र ४ रन खर्चेर ३ महत्वपूर्ण विकेट लिइन्, जसमा २० वटा डट बल समावेश थिए । त्यस्तै, मनीषा उपाध्याय र रिया शर्माले २–२ विकेट लिंदा सोनी पाख्रिनको नाममा १ विकेट रहेकाे थियाे ।
नेपालले यसअघि पहिलो खेलमा कतारलाई १०५ रनले हराएको थियो भने अब समुह डीमा नेपालले मंगलबार हङकङसँग खेल्ने खेल तालिका रहेकाे छ ।
