मकवानपुरमा खोलाले खाली ट्रक बगाएकाे छ । मकवानपुरको हेटौँडा उपमहानगरपालिका–१७, हटियास्थित कर्रा खोलामा आएको बाढीले खाली ट्रक बगाएको हाे ।
बिहान पाैने ८ बजे शिवम् सिमेन्ट फ्याक्ट्री नजिक खोला तर्ने क्रममा बनाइएको कल्भर्टमा पानीको बहाव बढेपछि सिमेन्ट फ्याक्ट्रीबाट ढुङ्गा अनलोड गरी फर्कँदै गरेको ना ७ ख ७६५ नम्बरको १२ चक्के आइचर ट्रक बगाएको प्रहरीले जनाएकाे छ ।
प्रहरीका अनुसार ट्रक चालक चितवनको रत्ननगर नगरपालिका–१३, बस्ने ३४ वर्षीय दीपक थिङसमेत ट्रकसँगै बगेकाेमा ट्रक चालक पौडिएर आफैँ बाहिर निस्कन सफल भए पनि खुट्टामा सामान्य चोट लागेको बताइएको छ ।
घटनापछि प्रहरी टोली घटनास्थलमा पुगेर उद्धार तथा आवश्यक व्यवस्थापन गरेको र घाइते थिङलाई उपचारका लागि हेटौँडा–चौघडास्थित राजु मेडिकलमा पठाइएको प्रहरीले जानकारी दिएकाे छ । घटनामा अन्य कुनै मानवीय क्षति नभएको र खोलामा रहेको ट्रक निकाल्न पहल भइरहेको बताइएको छ ।
