प्रेमिकालाई बोलाइदिन माग गर्दै नेपाल टेलिकमको टावरमा चढेका युवककाे सकुशल उद्धार गरिएको छ । सर्लाहीको सदरमुकाम मलंगवास्थित टेलिकमको ८० मिटर अग्लो टावरमा चढेर प्रेमिकालाई बोलाइदिन माग गरेका युवकको सकुशल उद्धार गरिएको हाे ।
आज बिहान जिल्लाकाे गोडैता नगरपालिका–९, बकैनिया निवासी २४ वर्षीय अफसर आलम हुसेन नेपाल टेलिकम कार्यालय परिसरभित्र रहेको टावरमा चढेका थिए । टावरमा चढेपछि उनले आफ्नाे साथीलाई फोन गरी आफू टावर माथि रहेको जानकारी दिएपछि घटनाबारे प्रहरीलाई जानकारी गराइएकाे थियो ।
सर्लाहीका प्रहरी प्रमुख एसपी रवीन्द्रनाथ पौडेलका अनुसार बिहान साढे ५ बजे घटनाको जानकारी प्राप्त भए लगतै प्रहरी तत्काल घटनास्थलमा परिचालन गरि उद्धार अभियान सुरु गरेको थियो । मानसिक तनावमा रहेका हुसेनलाई परिवारका सदस्य तथा सुरक्षाकर्मीले निरन्तर सम्झाइ–बुझाइ गरेपछि उनी बिहान पाैने ९ बजे टावरबाट तल झरेका थिए ।
उद्धारपछि उनलाई आवश्यक स्वास्थ्य परीक्षण तथा मनोसामाजिक परामर्शका लागि स्वास्थ्य संस्थामा पठाइएको र घटनाका कारण केही समय नेपाल टेलिकम कार्यालय परिसरमा स्थानीयवासीको भीड लागेको थियो । सुरक्षाकर्मी, परिवारका सदस्य र स्थानीयको प्रयासबाट कुनै अप्रिय घटना हुन नदिई युवकको सकुशल उद्धार गरिएको प्रहरीले जनाएको छ ।
