प्रिमियम छाला तथा केश स्याहार ब्राण्ड लोयर लण्डनले नेपालमा आफ्नो पहिलो ब्राण्ड दूतका रुपमा कथा क्रियसन्सलाई सार्वजनिक गरेको छ । हिजो काठमाडौंको नयाँ बस्तीस्थित मेलुङ मार्टमा आयोजित पत्रकार भेटघाटमा कम्पनीले सो घोषणा गरेको हो ।
त्यसक्रममा कम्पनीले आफ्नो ब्राण्ड, उत्पादनको गुणस्तर, नेपाली बजार विस्तारको योजना तथा कथा क्रियसन्ससँगको सहकार्यबारे जानकारीसमेत गरायो । कम्पनीका व्यवसाय प्रमुख राजन उप्रेतीले लोयर लण्डन अन्तर्राष्ट्रियस्तरको प्रिमियम छाला तथा केश स्याहार ब्राण्ड भएको जनाउँदै विगत चार महिनादेखि नेपाली बजारमा आफ्ना उत्पादनको प्रवर्द्धन र वितरण गरिरहेको बताए ।
उनका अनुसार उत्पादनको सूत्र (फर्मुलेसन) बेलायतको लण्डनमा तयार गरिएको हो भने उत्पादन भारतमा हुँदै आएको छ । हाल कम्पनीसँग ४५ भन्दा बढी प्रिमियम उत्पादन रहेको र ती नेपालसँगै भारत, मौरिसस तथा बेलायतका बजारमा उपलब्ध रहेको उनको भनाइ छ ।
सेरम, फेसवास, फेस मोइस्चराइजर, सनस्क्रिन, स्याम्पु, कन्डिसनर, फेस मास्क, स्क्रब, फेस क्रिम, नाइट क्रिम, डे क्रिम, टोनर, क्लिन्जर, हेयर सिरम तथा अन्य छाला र केश स्याहारसम्बन्धी उत्पादन बजारमा ल्याएको लोयर लण्डनले गुणस्तर र प्रभावकारिताका कारण उपभोक्ताबाट सकारात्मक प्रतिक्रिया प्राप्त भइरहेको दाबी गरेको छ ।
कथा क्रियसन्सका संस्थापक सम्राट अधिकारीले आफ्नो टोली विगत दुई वर्षदेखि सिर्जनात्मक डिजिटल सामग्री निर्माणमा सक्रिय रहेको बताए । उनले हालसम्म सात सयभन्दा बढी राष्ट्रिय तथा अन्तर्राष्ट्रिय ब्रान्डसँग सहकार्य गर्दै दुई हजारभन्दा बढी भिडियो तथा डिजिटल सामग्री निर्माण गरिसकेको जानकारी दिए ।
उनका अनुसार कथा क्रियसन्समा सम्राट अधिकारी, अनिस सिन्जाली मगर, रश्मि श्रेष्ठ, सृष्टि सुब्बा तथा अच्युत गुराँगाई आबद्ध छन् । कार्यक्रममा कलाकार तथा लेखक अच्युत गुराँगाईले नेपालमै रहेर सिर्जनात्मक क्षेत्रमा अवसर सिर्जना गर्न सकिने बताए । उनले सरकारी तथा गैरसरकारी निकायका लागि वृत्तचित्र, प्रचारात्मक तथा सिर्जनात्मक भिडियो निर्माण गर्नुका साथै कन्टेन्ट क्रियसनसम्बन्धी तालिम सञ्चालन गर्दै आएको पनि बताए ।
कम्पनीले आगामी दिनमा नेपालभर बजार विस्तार गर्दै अन्तर्राष्ट्रियस्तरका गुणस्तरीय छाला तथा केश स्याहार उत्पादन सहज रुपमा उपलब्ध गराउने लक्ष्य लिएको जनाएको छ । सञ्चारमाध्यम, कलाकार तथा सिर्जनात्मक क्षेत्रसँग सहकार्य गर्दै नेपाली उपभोक्तामाझ विश्वासिलो ब्रान्डका रूपमा स्थापित हुने कम्पनीको प्रतिबद्धता छ ।
पत्रकार भेटघाटमा सञ्चारकर्मीसँगै कलाकार, सामाजिक व्यक्तित्व तथा कम्पनीका प्रतिनिधिहरुको सहभागिता रहेको थियो । सहभागीहरूले कम्पनीका उत्पादन अवलोकन गर्नुका साथै भावी योजना र नेपाली बजारमा यसको सम्भावनाबारे जानकारी लिएका थिए ।
