पछिल्लाे समय मनसुन सक्रिय भएसँगै लगातारको वर्षा, बाढी र पहिरोका कारण देशकाे विभिन्न मुख्य राजमार्गहरू पूर्ण तथा आंशिक रूपमा अवरुद्ध भएका छन् । प्रहरी प्रधान कार्यालयको विवरणअनुसार कोशी, बागमती, गण्डकी र सुदूरपश्चिम प्रदेशका विभिन्न खण्डमा राजमार्ग अवरुद्ध हुँदा यातायात सेवा प्रभावित भएका छन् । राजमार्ग अवरुद्ध हुँदा यात्रा गर्नुअघि सडकको अवस्थाबारे जानकारी लिन र सावधानी अपनाउन सम्वन्धित सबैमा अनुरोध गरिएको छ ।
प्रहरी प्रधान कार्यालयका अनुसार कोशी प्रदेशको भोजपुर नगरपालिका–५ बोखिमस्थित मध्यपहाडी लोकमार्ग बाढीका कारण एकतर्फी मात्र सुचारु रहेको छ भने अर्को वैकल्पिक बाटो समेत उपलब्ध छ । त्यस्तै, इलामको इलाम नगरपालिका–९ राजुदवालीस्थित मेची राजमार्ग र खोटाङको दिक्तेल रुपाकोट मझुवागढी नगरपालिका–६ माम्खास्थित मध्यपहाडी लोकमार्ग पहिरोका कारण पूर्ण रूपमा अवरुद्ध भएका छन् ।
बागमती प्रदेशतर्फ, काभ्रेको खुर्कोट–नेपालथोक–कत्तुञ्जेबेँसी चल्ने विपि राजमार्ग सम्भावित बाढीका कारण प्रभावित भएको छ। यस खण्डमा राति ६ बजे देखि बिहान ४ बजेसम्म सम्पूर्ण सवारीसाधन सञ्चालन रोकिएको छ भने बिहान ४ देखि साँझ ६ बजेसम्म भने स्थितिको विचार गरी सवारीसाधन सुचारु हुने व्यवस्था मिलाइएको छ ।
त्यसैगरि सिन्धुपाल्चोकको भोटेकोशी गाउँपालिका–४ जिरीकिलो (तातोपानी जाने बाटो) र वडा नं २ कोदारी क्षेत्रमा पहिरोका कारण अरनिको राजमार्ग पूर्ण रूपमा अवरुद्ध छ । मकवानपुरको हेटौँडा–टिस्टुम–बागमती–ललितपुर जोड्ने कान्तिलोकपथमा सम्भावित बाढी तथा पहिरोका कारण रात्रिकालीन समयमा (साँझ ५ बजेदेखि बिहान ५ बजेसम्म) सवारीसाधन सञ्चालनमा रोक लगाइएको छ भने रसुवाको गोसाइकुण्ड गाउँपालिका–६ बोकेजुन्डास्थित पासाङ ल्हामु सडक खण्ड भने पहिरो पछि एकतर्फी रूपमा सञ्चालनमा आएको छ ।
त्यस्तै गण्डकी प्रदेशअन्तर्गत बागलुङको जैमिनी नगरपालिका–८ बेलगरमा पहिरो खस्दा कालीगण्डकी करिडोर सडक खण्ड पूर्ण रूपमा बन्द रहेको छ भने सुदूरपश्चिम प्रदेशको दार्चुलास्थित शैल्यशिखर नगरपालिका–६ पनेबाँज र मालिकार्जुन गाउँपालिका–८ ऐरीछिनामा गएको पहिरोका कारण महाकाली राजमार्ग पूर्ण रूपमा अवरुद्ध बनेको छ । हाल सडक अवरुद्ध भएका स्थानहरूमा यातायात सुचारु गर्ने प्रयास भइरहेको छ ।
