धनकुटामा ट्रक दुर्घटनापछि आगलागी हुँदा चालकको जलेर मृत्यु भएको छ । धनकुटाकाे तमोर करिडोर सडकखण्डअन्तर्गत चौबिसे गाउँपालिका–४, फलामेटामा ट्रक दुर्घटना भएकाे हाे ।
गएराति विराटनगरबाट ताप्लेजुङतर्फ जाँदै गरेको प्रदेश १–०२–००१ क ५३६३ नम्बरको ट्रक ब्रेक फेल भई सडकमा पल्टिएपछि आगलागी भएको थियाे । उक्त दुर्घटनामा ट्रक चालक भोजपुरका ३० वर्षीय विशाल राईको घटनास्थलमै मृत्यु भएको जिल्ला प्रहरी कार्यालय धनकुटाले जनाएको छ ।
ट्रकमा सवार सहचालक तेह्रथुमको म्याङलुङ नगरपालिका–९, का १८ वर्षीय सञ्जीव सौङ्ग्रौला भने सकुशल रहेकाे जिल्ला प्रहरी कार्यालय धनकुटाका प्रमुख प्रहरी उपरीक्षक (एसपी) नारायण रञ्जितकारले जनाएका छन् ।
घटना लगत्तै प्रहरी चौकी फलामेटाबाट खटिएको टोलीले नेपाल प्रहरी र स्थानीयको सहयोगमा एक घण्टापछि आगो नियन्त्रणमा लिएको प्रहरीले जनाएको छ ।
