पछिल्लाे समय एक महिनाकाे अवधिमा दैनिक उपभोग्य वस्तुको मूल्य अस्वाभाविक रूपमा बढेकाले सरकारलाई उपभोक्ता अधिकारकर्मीहरूले प्रभावकारी बजार अनुगमन गरी मूल्य नियन्त्रणमा हस्तक्षेप गर्न आग्रह गरेका छन् । हिजाे सिंहदरबारमा बसेको राष्ट्रिय सभाअन्तर्गत संघीयता सबलीकरण तथा राष्ट्रिय सरोकार समितिको बैठकमा बोल्दै उनीहरुले यस्तो आग्रह गरेका हुन् ।
अहिले दैनिक उपभोग्य वस्तु तथा सेवाको अस्वाभाविक मूल्यवृद्धि हुनुको मुख्य कारण बजार अनुगमन प्रभावकारी हुन नसक्नु नै हाे भन्ने उनीहरुको भनाइ रहेको थियाे । राष्ट्रिय उपभोक्ता मञ्चका अध्यक्ष मनोज थापाले चामल, चिनी, अण्डा, मासु र खाने तेललगायत अत्यावश्यक वस्तुको मूल्य एक महिनाको अवधीमा उल्लेख्य रुपमा वृद्धि भएको भन्दै सरकारको ध्यमनाकर्षण गराएका थिए ।
एक महिनाकाे अवधिमा मन्सुली चामलको एक बोरामा करिब ४ सय रुपैयाँले महँगिएको छ । सरकारले चिनीको खुद्रा मूल्य प्रतिकिलो एक सय रुपैयाँ प्रतिकिलो तोके पनि बजारमा १२० रुपैयाँ प्रतिकिलोको दरले वृद्धि भइरहेको थापाले जानकारी दिएका थिए । अध्यक्ष थापाले अत्यावश्यक वस्तुको मूल्यवृद्धिले आम उपभोक्ता प्रत्यक्ष मारमा परेको बताउँदै कृषि उपजमा विचौलिया छिर्दा किसान र उपभोक्ता दुवै मारमा परेको बताए ।
बजार अनुगमनका लागि पर्याप्त जनशक्ति नभएको सरकारी दावीप्रति असहमति जनाउँदै स्थानीय तह, प्रदेश र संघीय सरकारबीच समन्वय गरेर अनुगमनलाई प्रभावकारी बनाउन सकिने अध्यक्ष थापाकाे भनाइ रहेकाे थियाे ।
