काठमाण्डू, सरकारले चालू आर्थिक वर्षका लागि वृद्धि गरेको तलब तथा भत्तासम्बन्धी व्यवस्था यही साउन महिनादेखि लागू हुने भएको छ।
मन्त्रिपरिषद्को साउन ६ गते बसेको बैठकले तलब, प्राविधिक ग्रेड तथा प्रोत्साहन भत्तासम्बन्धी निर्णय गरेसँगै नयाँ तलबमान कार्यान्वयनमा आउने भएको हो।
नयाँ तलबमान निजामती कर्मचारीका साथै नेपाली सेना, नेपाल प्रहरी, सशस्त्र प्रहरी बल, स्वास्थ्य सेवा, सामुदायिक विद्यालयका शिक्षक तथा प्रदेश र स्थानीय तहमा कार्यरत कर्मचारीहरू मा समेत लागू हुनेछ।
सुरक्षा निकायतर्फ सबैभन्दा बढी तलब प्रधानसेनापति ले पाउनेछन्। नयाँ व्यवस्था अनुसार प्रधानसेनापतिको आधारभूत तलब र ग्रेडसहित मासिक ९० हजार ५९४ रुपैयाँ पुगेको छ।
त्यसैगरी रथी ले ८७ हजार ८५ रुपैयाँ, उपरथी ले ८४ हजार ५७६ रुपैयाँ र सहायक रथी ले ८१ हजार २२० रुपैयाँ तलब पाउनेछन्।
नेपाल प्रहरी र सशस्त्र प्रहरी बलका महानिरीक्षक (आईजीपी) तथा अतिरिक्त महानिरीक्षक (एआईजी) को तलब समान कायम गरिएको छ।
नयाँ तलबमानअनुसार दुवै निकायका आईजीपी र एआईजीले ८४ हजार ५७६ रुपैयाँ मासिक तलब पाउनेछन्।
यी पदमा समान दुई ग्रेडको व्यवस्था गरिएको छ।
यस्तै, प्रहरी नायब महानिरीक्षक (डीआईजी) को तलब ७३ हजार ७५० रुपैयाँ, वरिष्ठ प्रहरी उपरीक्षक (एसएसपी) को ७० हजार ७९४ रुपैयाँ, प्रहरी उपरीक्षक ९एसपी० को ६७ हजार ९२ रुपैयाँ, प्रहरी नायब उपरीक्षक (डीएसपी) को ६२ हजार ५४६ रुपैयाँ तथा प्रहरी निरीक्षक (इन्स्पेक्टर) को ६० हजार ८७४ रुपैयाँ निर्धारण गरिएको छ।
सरकारले तलब वृद्धिसँगै कर्मचारीको मनोबल उच्च बनाउने, सेवा प्रवाहलाई प्रभावकारी बनाउने तथा सार्वजनिक सेवामा दक्ष जनशक्ति टिकाइराख्ने उद्देश्य लिएको जनाएको छ।
