काठमाण्डू, नेपाल स्टक एक्सचेन्ज (नेप्से) परिसूचक बिहीबार १३.८२ अंकले घटेर २,६५४.०० बिन्दूमा कायम भएको छ।
दिनभर बजार ओरालो लाग्दा अधिकांश कम्पनीको सेयर मूल्यमा गिरावट आएको हो।
आज कारोबार भएका ६४ कम्पनीको सेयर मूल्य बढेको, २०२ कम्पनीको घटेको तथा १० कम्पनीको मूल्य स्थिर रहेको नेप्सेले जनाएको छ।
कारोबार रकम भने अघिल्लो दिनको तुलनामा केही बढेको छ। बुधबार ४ अर्ब ४० करोड रुपैयाँ बराबरको कारोबार भएकोमा बिहीबार ४ अर्ब ६२ करोड रुपैयाँ बराबरको सेयर किनबेच भएको छ।
समूहगत परिसूचकतर्फ व्यापार समूह बाहेक सबै उपसमूह राताम्मे रहे।
व्यापार समूह ०.५९ प्रतिशत ले बढ्दा बैंकिङ ०.८४ प्रतिशत, विकास बैंक ०.३८ प्रतिशत, फाइनान्स ०.१० प्रतिशत, होटल तथा पर्यटन ०.४६ प्रतिशत, जलविद्युत् ०.३८ प्रतिशत, लगानी ०.३० प्रतिशत, जीवन बीमा ०.६७ प्रतिशत, उत्पादन तथा प्रशोधन ०.८८ प्रतिशत, माइक्रोफाइनान्स ०.३० प्रतिशत, निर्जीवन बीमा ०.७३ प्रतिशत तथा अन्य समूह ०.२८ प्रतिशत ले घटेका छन्।
कारोबार रकमका आधारमा जलविद्युत् समूह अग्रस्थानमा रह्यो। यस समूहमा २ अर्ब ४७ करोड रुपैयाँ बराबरको कारोबार भएको छ।
त्यसपछि वाणिज्य बैंक समूहमा ४९ करोड ८२ लाख रुपैयाँ, विकास बैंक समूहमा ३१ करोड रुपैयाँ तथा फाइनान्स समूहमा २७ करोड रुपैयाँ बराबरको कारोबार भएको छ।
आज अपर लोहोरेखोला हाइड्रोपावर को सेयर मूल्य सबैभन्दा धेरै १५ प्रतिशत ले बढ्यो।
त्यसैगरी कालंगा हाइड्रो को ४.६२ प्रतिशत र सानीगढ हाइड्रोपावर को २.४६ प्रतिशत ले मूल्य वृद्धि भएको छ।
यता, स्नो रिभर फल्स हाइड्रोपावर को सेयर मूल्य ५ प्रतिशत, जोशी हाइड्रोपावर को ४.७० प्रतिशत तथा कृषि विकास बैंक को ३.५० प्रतिशत ले घटेको छ।
कारोबार रकमका आधारमा रिडी पावर, आँखुखोला जलविद्युत्, सोलु हाइड्रोपावर, नेसनल हाइड्रोपावर र खानीखोला हाइड्रोपावर सबैभन्दा बढी कारोबार हुने कम्पनीका रूपमा रहेका छन्।
