नेपालीहरुकाे चाडपर्वको मौसम नजिकिदै गर्दा चिनी अभाव हुने हल्ला फैलाएर मूल्य बढाउन थालिएको छ । जसअनुसार पछिल्लो १ महिनामै चिनीको मूल्य प्रतिकिलो २० रुपैयाँसम्म बढेको छ ।
चिनीसँगै अन्य दैनिक उपभाेग्य खाद्य साम्रागीकाे मूल्य बढ्न थालेपछि उपभोक्ता मारमा परेका छन् । विशेष परिस्थितिबाहेक एकै पटक ठुलो मूल्य वृद्धि गर्न नमिल्ने अन्तर्राष्ट्रिय बजार मान्यताविपरीत पछिल्लो समय चिनीको मूल्य बढाइएको हाे ।
गत वैशाख अन्तिम साता भारतले चिनी निर्यातमा प्रतिबन्ध लगाउने निर्णय गरेपछि नेपाली बजारमा अभाव हुने त्रास फैलाइएको थियो भने त्यसपछि नेपाल चिनी उद्योग संघले जेठ १ गते विज्ञप्ति जारी गर्दै पर्याप्त स्टक रहेकाले अभाव नहुने जानकारी दिएको थियो । उक्त समयमा संघले १ लाख ८ हजार टन चिनी मौज्दात रहेको बताएको थियो ।
अहिले ३ महिनाकाे अवधिमा मौज्दात सकिन लागेको भन्दै मूल्य बढाइएको छ । चाडपर्वबाहेक नेपालमा चिनीको औसत माग २५ हजार टन भए पनि जेठ, असार र साउनमा दैनिक १२–१५ टन मात्रै खरिदबिक्री हुने गरेकाले अहिले चिनीकाे अभाव नहुनुपर्नेमा उद्योगीले बजारमा पठाउने चिनीको मात्रा घटाएर मूल्य बढाएको आरोप खुद्रा व्यापारीहरूको छ ।
अहिले काठमाडौँ उपत्यकाकामा चिनी प्रतिकिलो ११५ देखि १२० रुपैयाँसम्म कारोबार भइरहेको छ । १ महिनाअघि ९५ देखि १०० रुपैयाँमा पाइने चिनी अहिले १२० रुपैयाँसम्म पुगेपछि उपभोक्ता मारमा परेकाे र नजिकिँदै गरेका चाडपर्वमा चिनी नपाइने हो कि भन्ने चिन्ता उपभोक्तामा बढेको देखिन्छ ।
उता वाणिज्य, आपूर्ति तथा उपभोक्ता संरक्षण विभागका निर्देशक तारानाथ लुइँटेलले मूल्य विश्लेषणको काम भइरहेको र हालसम्मको विश्लेषणमा चिनीको मूल्य प्रतिकिलो १२० रुपैयाँ नभई ११०–११५ रुपैयाँसम्म पुगेको भेटिएको बताउँदै मौज्दातमा रहेको चिनी सकिन लागेकाले भारतबाट आयातको तयारी भइरहेको उनले जानकारी दिएका छन् ।
