सिद्धबाबा सुरुङमार्ग नजिक पहिरो खसेपछि सिद्धार्थ राजमार्ग अवरुद्ध भएको छ । सिद्धार्थ राजमार्गअन्तर्गत पाल्पाको तिनाउ गाउँपालिका–३, सिद्धबाबा सुरुङमार्ग नजिक पहिरो खसेपछि सडक पूर्णरुपमा अवरुद्ध भएको हाे ।
बिहान करिब साढे ७ बजेतिरकाे समयमा सुरुङमार्गको पाल्पातर्फ प्रवेश गर्ने स्थानबाट १०० मिटर उत्तरतर्फ सडक माथिबाट पहिरो खसेपछि राजमार्ग अवरुद्ध भएको हाे । जिल्ला प्रहरी कार्यालय पाल्पाका सूचना अधिकारी प्रहरी नायब उपरीक्षक भीमलाल भट्टराईका अनुसार अहिले उक्त सडकखण्ड पूर्णरुपमा अवरुद्ध भएको छ ।
अहिले पनि निरन्तर पहिरो झरिरहेकाले तत्काल बाटो खुलाउने सम्भावना नरहेकाे र काम सुरु गर्न नसकिएको प्रहरीले जनाएको छ । पहिरो रोकिएपछि सडक खुलाउने कार्य सुरु गरिने बताइएकाे छ ।
घटनास्थलमा प्रहरी चौकी दोभानबाट प्रहरी सहायक निरीक्षक (प्रसनि)को कमाण्डमा ट्राफिक प्रहरीसहित पाँच जनाको टोली खटिएको प्रहरी नायब उपरीक्षक भट्टराईले जनाएका छन् ।
पहिरोका कारण राजमार्ग अवरुद्ध भएपछि यात्रु तथा सवारीसाधन आवागमन प्रभावित भएको छ।
