अहिले देशका मुख्य ठुला नदीहरूमा पानीकाे बहाव सामान्य देखिए पनि केही पहाडी तथा हिमाली जिल्लाका साना नदीहरूमा आकस्मिक बाढीको जोखिम देखिएको छ ।
आज बिहान जल तथा मौसम विज्ञान विभागअन्तर्गतको बाढी पूर्वानुमान महाशाखाले जारी गरेको बुलेटिनअनुसार कोशी, नारायणी, बागमती, कर्णाली र महाकालीका साथै तिनका सहायक नदीहरूमा पानीको तह सतर्कता विन्दुभन्दा तलै छ ।
त्यसैगरी कन्काई, कमला, बबई, पूर्वी राप्ती र पश्चिम राप्ती नदीको बहाव पनि हाललाई सुरक्षित अवस्थामै रहेको महाशाखाले जनाएको छ ।
ठुला नदीमा तत्काल ठुलो बाढीको जोखिम नरहे पनि साना नदी तथा खोलामा भने बहाव तीव्र रूपमा बढ्न सक्ने महाशाखाकाे भनाइ रहेकाे छ ।
महाशाखाकाे बुलेटिनमा भनिएको छ, ‘रामेछाप, दोलखा, सिन्धुपाल्चोक, काठमाडौँ, भक्तपुर, ललितपुर, काभ्रेपलाञ्चोक, गोरखा, लमजुङ, कास्की, स्याङ्जा, बझाङ र दार्चुला आसपास भई बहने साना नदीहरूमा बहाव उल्लेख्य बढ्ने सम्भावना रहेकाे छ ।’
महाशाखाका अनुसार बाढीको जोखिम आगामी दिनहरूमा पनि जारी रहने पूर्वानुमान गरिएको छ । भाेलि बागमती, गण्डकी, लुम्बिनी र कर्णाली प्रदेश भई बहने केही साना नदीहरूमा बहाव अचानक बढ्न सक्नेछ ।
पर्सि शुक्रबार गण्डकी, लुम्बिनी र सुदूरपश्चिम प्रदेशका साना नदी तथा खोलाहरूमा पनि आकस्मिक रूपमा पानीको सतह बढ्न सक्ने भएकाले तटीय क्षेत्रका बासिन्दालाई सतर्कता अपनाउन आग्रह गरिएको छ ।
