देशका विभिन्न भागमा परेकाे वर्षा, बाढी र पहिरोका कारण मुख्य राजमार्गहरू अवरुद्ध भएका छन् । वर्षा, बाढी र पहिरोका कारण कोशी, बागमती र कर्णाली प्रदेशका विभिन्न सडक खण्डमा जोखिम बढेसँगै यातायात सेवा प्रभावित भएको प्रहरी प्रधान कार्यालयले जनाएकाे छ ।
जसमा कोशी प्रदेशको इलाम नगरपालिका–९, राजदुवालीस्थित मेची राजमार्ग भदौ २३ गतेदेखि पूर्ण रूपमा अवरुद्ध भएकाे छ । ताप्लेजुङ–झापा जोड्ने उक्त सडक बन्द भएपछि हाल वैकल्पिक बाटो प्रयाेग गरि सवारी सञ्चालन गरिएको छ ।
त्यसैगरि बागमती प्रदेशको पृथ्वी राजमार्गअन्तर्गत धादिङको बेनिघाट रोराङ गाउँपालिका–७, कृष्णभिर र गजुरी गाउँपालिका–२, परेवाभिरमा भदौ १४ गते पहिरो खसेपछि सडक पूर्ण रूपमा अवरुद्ध बनेको छ ।
बागमती प्रदेशकै अरनिको राजमार्गअन्तर्गत सिन्धुपाल्चोकको भोटेकोशी गाउँपालिका–२, कोदारीमा पनि पहिरोका कारण यातायात ठप्प भएकाे छ । त्यस्तै रसुवामा बाढीका कारण उत्तरगया गाउँपालिका–५, खाल्टेस्थित त्रिशुली मैलुङ स्याफ्रुबेसी सडक खण्ड र पासाङ ल्हामु सडक खण्डका मुख्य राजमार्गहरू पूर्ण रूपमा बन्द भएका छन् ।
