यहि भदाै १० गते बुधबारका दिन रसुवाकाे भाेटेकाेशीमा गएकाे बाढीका कारण प्रभावित भएका नागरिकको उद्धार, राहत तथा पुनःस्थापनाका लागि सरकारले सञ्चालन गरेको प्रधानमन्त्री दैवी प्रकोप कोषमा ५ अर्ब २४ करोड बढी रकम संकलन भएकाे छ । उक्त काेषमा हालसम्म ५ अर्ब २४ करोड ६९ लाख ४४ हजार रुपैयाँ संकलन भएको हाे ।
प्रधानमन्त्री दैवी प्रकोप कोष तथा प्रधानमन्त्री कोषमार्फत बाढीपीडितका लागि आर्थिक सहयोग जुट्ने क्रम जारी रहेकाे प्रधानमन्त्री तथा मन्त्रिपरिषद्को कार्यालयले जनाएकाे छ । कार्यालयले सञ्चालनमा ल्याएको ‘उद्धार अनुरोध पोर्टल’ मार्फत स्वदेश तथा विदेशबाट प्राप्त सहयोगको विवरण पारदर्शी रूपमा सार्वजनिक गरिएको जनाएको छ ।
प्रधानमन्त्री दैवी प्रकोप कोषमा ९ वटा वाणिज्य बैंकका खातामार्फत उक्त रकम संकलन भएको हो । त्यसैगरि हिमालयन बैंक र लक्ष्मी बैंकमा थप २१ लाख ४३ हजार २३२ अमेरिकी डलर जम्मा भएको कार्यालयले जनाएको छ ।
सरकारले अहिलेकाे विपद्को घडीमा प्राप्त सहयोगको पारदर्शी उपयोग तथा उचित व्यवस्थापन सुनिश्चित गर्न र सम्भावित वित्तीय ठगीबाट जोगिन आधिकारिक क्यूआर कोड तथा ‘प्रधानमन्त्री दैवी प्रकोप कोष’ र ‘प्रधानमन्त्री कोष’ नामका खातामा मात्र आर्थिक सहयोग गर्न आग्रह गरेको छ ।
कोषमा रकम जम्मा गर्न आवश्यक बैंक खाता तथा अन्य विस्तृत विवरण प्रधानमन्त्री तथा मन्त्रिपरिषद्को कार्यालयको आधिकारिक वेबसाइटमा उपलब्ध रहेको पनि कार्यालयले जनाएको छ ।
