सडक अवरुद्ध हुँदा हवाई यात्रुको चाप बढ्याे

अविरल वर्षा र बाढि पहिराेका कारण पृथ्वी राजमार्गको कृष्णभिरलगायत स्थानका सडक अवरुद्ध बनेपछि भरतपुर-काठमाडौं हवाई यात्रुको चाप बढेको छ । हवाई यात्रुको चाप बढेसँगै भरतपुरबाट हुने उडान दोब्बरभन्दा बढी गरिएको छ ।

भरतपुरबाट काठमाडौं लागि बुद्ध एयरको मात्रै जहाज सञ्चालन हुँदै आएकाे छ । बुद्ध एयर भरतपुर कार्यालयका प्रमुख भक्तबहादुर बस्नेतका अनुसार सामान्य अवस्थामा भरतपुरबाट काठमाडौंका लागि दैनिक पाँच उडान हुँदै आएकोमा सडक असहज बनेसँगै उक्त सङ्ख्या बढाएर ११ वटासम्म पुर्‍याइएको छ ।

अहिले दैनिक उडान आवश्यकताअनुसार ९ देखि ११ सम्म पुर्‍याइएको प्रमुख बस्नेतले जनाएका छन् । भरतपुरबाट काठमाडौं आवतजावत गर्ने ‘एटिआर ७२’ जहाज हो भने यसले काठमाडौंबाट आउँदा ६५ देखि ७० र यहाँबाट काठमाडौं जाँदा ५० जना यात्रु ओसार्ने गर्दछ ।

उक्त जहाजकाे क्षमता ७२ जनाको भए पनि धावन मार्ग छोटो भएका कारण क्षमता अनुसारको यात्रु ओसार्न नसक्ने बताइएकाे छ । पछिल्लाे समय कृष्णभिरमा सडक अवरुद्ध भएपछि चितवनबाट मकवानपुर हुँदै काठमाडौं जाने वैकल्पिक सडक प्रयोग गर्न सकिने भएपनि वर्षायामका कारण यात्रुले हवाई यात्रालाई प्राथमिकता दिने गरेको बताइएकाे छ ।