पृथ्वी राजमार्ग अवरुद्ध भएसँगै पछिल्लो तीन दिनमा काठमाडौं उपत्यकामा ८७ हजारभन्दा बढी खाना पकाउने एलपी ग्यासका सिलिन्डर भित्रिएको छ । नेपाल आयल निगमका अनुसार भदौ १८ देखि २० गते (शनिबार) सम्ममा विभिन्न कम्पनीका कुल ८७ हजार ८७७ सिलिन्डर ग्यास काठमाडौं भित्रिएकाे हो ।
भदौ १४ गते पृथ्वी राजमार्गको कृष्णभिर खण्डमा गएको पहिरोका कारण सडक अवरुद्ध भएपछि निगमले वैकल्पिक मार्ग प्रयोग गरी आपूर्ति व्यवस्था सहज बनाइरहेको छ । निगमका अनुसार अहिले कुलेखानी-भीमफेदी मार्ग हुँदै काठमाडौंमा ग्यास भित्र्याइएको बताइएको छ ।
निगमको तथ्यांक अनुसार भदौ १८ गते २४ हजार ४९४, भदौ १९ गते ३४ हजार १३४ र भदौ २० गते २९ हजार २४९ सिलिन्डर ग्यास काठमाडौं उपत्यका भित्रिएको थियाे ।
मुख्य राजमार्ग बन्द भएपछि काठमाडौं, धादिङ र काभ्रेपलाञ्चोकमा रहेका उद्योगका ग्यास सिलिन्डरहरू बारा, पर्सा, मकवानपुर, चितवन, नवलपरासी, धनुषा र महोत्तरीका उद्योगहरूमा रिफिल गराएर वैकल्पिक बाटोबाट भित्र्याउने व्यवस्था मिलाइएको छ ।
