काठमाण्डू, कांग्रेस नेता डा. शेखर कोइरालाले पार्टीको आउँदो पन्ध्रौँ महाधिवेशन लम्ब्याउने कुनै पनि प्रयास नगर्न सभापति शेरबहादुर देउवालाई कडा चेतावनी दिएका छन् ।
डा. कोइरालाले पार्टीको केन्द्रीय कार्यसमिति बैठकमा लिखित मन्तव्य राख्दै, महाधिवेशन समयमै सम्पन्न गर्न पार्टीका विधान र नियमावली संशोधनका लागि अविलम्ब समिति गठन गर्न आग्रह गरे ।
डा. कोइरालाले विगत आठ वर्षदेखि कांग्रेसले राष्ट्रिय राजनीतिमा खेलेको भूमिकाको समीक्षा गर्न आफू इच्छुक नरहेको तर, पार्टीको जनाधार खुम्चिएको तथ्यलाई भने नकार्न नसकिने टिप्पणी गरे ।
उनले सभापति देउवालाई पार्टीको पन्ध्रौँ महाधिवेशन लम्ब्याउने कुनै प्रपञ्च नगरौँ भनी स्पष्ट रूपमा चेतावनी दिए।
उनले १४औँ महाधिवेशनदेखि बाँकी रहेका क्रियाशील सदस्यता लगायतका समस्याहरू तत्काल समाधान गरी, २०८२ मंसिरमा १५औँ महाधिवेशन गर्ने सुनिश्चितता यही केन्द्रीय समिति बैठकले गर्नुपर्ने माग राखेका छन् ।
डा. कोइरालाले चेतावनी दिँदै भने, ‘यो वा त्यो बहानामा महाधिवेशन सार्ने प्रयास गरियो भने यसले कांग्रेस र लोकतन्त्र दुवैलाई दुर्घटनातर्फ धकेल्नेछ।
कांग्रेसको महाधिवेशन चार वर्षमै सम्पन्न हुनुपर्छ। बिग्रिएको प्रणालीलाई ट्रयाकमा ल्याउन म यो विषयमा जोड दिइरहेको छु।’
उनले क्रियाशील सदस्यता वितरण र महाधिवेशनको तयारीमा समयबद्ध कार्यतालिका बनाएर जुट्न पनि जिम्मेवारी पाएका साथीहरूलाई आग्रह गरे ।
डा. कोइरालाले अहिलेको राजनीतिक परिपाटीमा लोकरिझ्याँई ‘पपुलिज्म’ हावी भएको बताए ।
त्यसले कांग्रेस पार्टीलाई पनि असर गरेको धारणा राख्दै भने, ‘कांग्रेसको आफ्नै मौलिकता, आदर्श, र सिद्धान्त छन्, तर अहिले सामाजिक सञ्जाल र पपुलिज्मले पार्टीलाई गलत दिशामा डोऱ्याउने खतरा देखिन्छ। यसले पार्टी कहाँ पुग्छ, बेलैमा सोच्न जरुरी छ।’
