काठमाण्डू, नेपालको काठमाडौँ महानगरपालिका र जापानको मात्सुमोतो नगरबिचको भगिनी सम्बन्ध स्थापना भएको ३५ औँ वर्षको अवसरमा मात्सुमोतो नगरपालिकाका प्रमुख योशिनाओ गान नेतृत्वको प्रतिनिधि मण्डल नेपाल भ्रमणमा आएको छ ।
काठमाडौँको अवलोकन भ्रमणका लागि आएको प्रतिनिधि मण्डलको स्वागतमा काठमाण्डू, महानगरपालिकाले आयोजना गरेको कार्यक्रममा दुवै नगर प्रमुखले नागरिक स्तरका कार्यक्रममा विस्तार भएको बताएका छन् ।
भेटका क्रममा महानगरपालिकाका प्रमुख बालेन्द्र शाहले मित्रताको चिनो स्वरूप ढाका टोपी र देशे मरु झ्याः को प्रतिकृति उपहार स्वरूप प्रदान गरेका थिए ।
यस्तै, मात्सुमोतोका प्रमुख गानले, हस्तकलाबाट निर्मित सामग्री उपहार स्वरूप प्रदान गरेका थिए ।
भ्रमण टोलीका सदस्यहरूलाई महानगरपालिकाका उपप्रमुख सुनिता डङ्गोलले ढाका टापी, पस्मिनाको सल र वुद्ध प्रतिमा उपहार स्वरूप प्रदान गरे ।
मात्सुमोतोको प्रतिनिधि मण्डलमा मात्सुमोतो नगर परिषद्का अध्यक्ष युताका कामिझोसहित विभिन्न सङ्घसंस्थाका १९ जना प्रतिनिधि सहभागी छन् ।
स्वागत कार्यक्रममा मात्सुमोतो नगरका कर्मचारीहरुकातर्फबाट सङ्कलन गरिएको दुई लाख जापानी येन प्रमुख गानले महानगरपालिकाका प्रमुख प्रशासकीय अधिकृत सरोज गुरागाईँलाई हस्तान्तरण गरे ।
गएको असोज महिनामा काठमाडौँमा बाढी आएर जनजीवनमा प्रभाव पारेको खबर पाएपछि यस प्रकारको प्रकोपमा सहयोग गर्न रकम सङ्कलन भएको रकम भ्रमणका अवसरमा हस्तान्तरण गरिएको हो ।
स्वागत कार्यक्रममा सहरी योजना आयोगका उपाध्यक्ष डा.सुमननरसिंह राजभण्डारीसहित पदाधिकारीहरू सहभागी थिए ।
प्रतिनिधि मण्डल मङ्गलबार काठमाडौँ आएको हो । आगमन अवसरमा प्रमुख गानलाई अन्तर्राष्ट्रिय सम्बन्ध सचिवालयका प्रमुख बलराम त्रिपाठीसहित अधिकारीहरूले विमानस्थलको विशिष्ट कक्षमा स्वागत गरे ।
मङ्गलबार नै टोलीले ललितपुरको पाटन दरबार स्क्वायरको अवलोकन गरेको छ ।
बुधबार वसन्तपुर, स्वयम्भू र बौद्ध क्षेत्रको अवलोकन गर्ने, नयाँ बजारमा रहेको मल्टिपर्पोस मार्सल आर्ट सेन्टरको अवलोकन गर्ने तथा स्थानीय संघसंस्थाहरुसँग भेटघाट गर्ने कार्यक्रम छ ।
बिहीबार भक्तपुरको अवलोकन गरेर टोली साँझ स्वदेश फर्कनेछ ।
काठमाडौँ र मात्सुमोतो नगरकाबिचमा सन् १९८९ नोभेम्बर १७ तारिखका दिन भगिनी सम्बन्ध स्थापना गर्ने सहमति पत्रमा हस्ताक्षर भएको थियो ।
सम्बन्ध स्थापना भएको १० औँ वर्षको अवसरमा दुवै नगरकातर्फबाट लगानी गरेर महानगरको वडा १६ नयाँ बजारमा बहुउद्देश्यीय मार्सल आर्ट केन्द्र निर्माण गरियो ।
एक करोड २२ लाख ८६ हजार लागतमा निर्माण भएको केन्द्रका लागि जापान सरकार र मात्सुमोतो नगरकातर्फबाट ६६ लाख ६६ हजार ६६३ रुपियाँ सहयोग प्राप्त भएको थियो ।
२०५८ साल वैशाख १९ गते शिलान्यास भएको केन्द्र त्यसै वर्षको माघ ३ गते तात्कालीन प्रधानमन्त्री शेरबहादुर देउवा र जापानका पूर्वप्रधानमन्त्री रियोतारो हासिमोतोले संयुक्त रुपमा उद्घाटन गरेका थिए ।
केन्द्र ६ रोपनी ११ आना जग्गामा फैलिएको छ । २०७२ सालको भूकम्पले यसलाई आंशिक क्षति पुर्याएको थियो ।
२०७२ सालको भूकम्पले पुर्याएको क्षति व्यवस्थापन गर्न मात्सुमोतो नगरले एक करोड जापानी येन सहयोग गरेको थियो ।
त्यस रकममा जापानी जनताकोतर्फबाट सङ्कलन भएको ८० लाख येन र नगरकोतर्फबाट प्रदान गरिएको २० लाख येनबराबर हुन आउने रकम थियो ।
मल्टिपर्पोस मार्सल आर्ट सेन्टरमा जुडो एण्ड केन्दो प्रशिक्षण हुने गरेको छ ।
२०७६ सालमा मात्सुमोतो नगरका तात्कालीन प्रमुख केन्दो खेलमा प्रयोग हुने सिनाइ (बेतको विशेष खालको लौरो )६० थान र जुडो गि १० थान प्रदान गरेका थिए ।
