सर्लाही, सर्लाही जिल्लाको रामनगर गाउँपालिका–५ स्थित वैजनाथ चोकमा वडाध्यक्षसहितका स्थानीयसँग झडप भएपछि प्रहरीले ५ राउन्ड हवाइ फायर गरेको छ।
मापसे जाँचका लागि खटिएको प्रहरी र स्थानीय युवाबीच विवाद भएपछि तनाव भएको हो ।
प्रहरीमाथि आक्रमण भएपछि हवाई फायर गर्नुपरेको मधेश प्रदेश प्रहरी प्रवक्ता एसपी सुवास बोहोराले बताए।
गएराति करिब ९ बजेतिर बैजनाथ चोकमा इलाका प्रहरी कार्यालय गडहिया डुमरियाका प्रमुख प्रहरी निरीक्षक उज्ववल कार्कीको कमान्डमा मापसे चेकिङ भइरहेको थियो।
वडाध्यक्ष टोलीको आक्रमणबाट प्रहरी हवल्दार शैलेन्द्र रायको टाउकोमा चोट लागेको छ। रायलाई उपचारका लागि जनकपुर न्यूरो अस्पतालमा भर्ना गरिएको छ।
वडाध्यक्ष श्रीनन्दन यादवले भने प्रहरीले चेकिङको नाममा स्थानीयसँग रकम असुलेको र केहीलाई हिरासतमा राखेको गुनासो आएपछि आफू सो स्थानमा पुगेको बताएका छन्।
