काठमाण्डू, सहकारी ठगी मुद्दामा राष्ट्रिय स्वतन्त्र पार्टी (रास्वपा)का सभापति रवि लामिछानेका तर्फबाट बहस सुरु भएको छ ।
काठमाडौं जिल्ला अदालतमा लामिछानेको तर्फबाट पूर्वमहान्यायाधिवक्ता सुशील पन्तले बहस गरिरहेका छन् ।
सोमबार बहस नसकिएपछि मुद्दा अर्को दिनका लागि हेर्दाहेर्दैमा राखिएको थियो । सोमबार अदालतमा जाहेरवाला र सरकारी वकिलको बहस सकिएको थियो ।
समय अभाव भएकाले प्रतिवादीको तर्फबाट भने बहस हुन पाएको थिएन । मङ्गलबार सार्वजनिक बिदा भएकाले बहस हुन सकेन् ।
यसर्थ सोमबारको बहसलाई आज निरन्तरता दिइएको हो । लामिछाने तर्फका वकिलहरूको बहस सकिएपछि सरकारी वकिलले जवाफी बहस गर्नेछन् ।
लामिछानेलाई हिरासतमुक्त गर्ने वा थुनामा राख्ने भन्ने आदेश आजै आउने प्रबल सम्भावना छ ।
स्वर्णलक्ष्मी सहकारीको रकम सङ्गठित तवरले ठगी गरेको अभियोगमा लामिछानेविरुद्ध मुद्दा दायर भएको छ ।
