ताप्लेजुङ, ताप्लेजुङको पाथीभरामा केबलकार निर्माणको विरोध गरिरहेको समूहले पाँचथरमा रुख ढालेर सडक अवरुद्ध गर्दा सुत्केरी व्यथा लागेर एम्बुलेन्समा अस्पताल गइरहेकी एक महिला बिचल्लीमा परेकी छिन् ।
सडक अवरोधका कारण हिलिहाङ–२ को सिंहपुरदेखि सदरमुकाम फिदिम लाँदै गरेकी १८ वर्षीय कल्पना जोगीसहितका बिरामीको बिचल्ली भएको हो ।
चारवटा रुख ढालेर बाटो अवरुद्व गरिएकाले सोमबार मध्यराति २ बजे सुत्केरी व्यथाले चापेकी ती महिलालाई पुनः गोपेटार फर्काइएको एम्बुलेन्स चालक नुपु शेर्पाले सामाजिक सञ्जालमार्फत् जानकारी दिएका छन् ।
उनले राखेको भिडिओमा सुत्केरी व्यथा लागेकी महिला चिच्याइरहेको सुन्न सकिन्छ ।
यतिबेला पाथीभरामा केबलकार निर्माणको विरोध गरिरहेको ‘नो केबलकार समूह’ले मेची राजमार्गअन्तर्गत पाँचथरको जोरपोखरी–गोपेटार सडक खण्डमा रुख ढालेर सडक अवरोध गरेको छ ।
ती महिलाको अवस्था केही जटिल रहेकाले गोपेटारमा बिहानसम्म पनि प्रसुति गराउन नसकिएको सथानीय स्वास्थ्यकर्मीलाई उद्धृत गर्दै पाँचथर प्रहरीले जनाएको छ ।
आज (मङ्गलबार) बिहान प्रहरीले बाटो खुलाउने प्रयास गरिरहेको छ । बाटो खुलेपछि बिरामीलाई पुनः फिदिम ल्याउने तयारी भइरहेको बताइएको छ ।
माघ १५ देखि मेची राजमार्ग र तमोर करिडोर बन्द गर्दै आएको ‘नो केबलकार समूह’ले आजदेखि अरुण पूर्वका ९ जिल्लामा आमहड्तालको आह्वान गरेको ।
उक्त समूहले सोमबार राति सरकारसँग वार्ता गरेको थियो । सो वार्ता निष्कर्षमा पुग्न नसकेपछि मङ्गलबार पुनः वार्ता हुँदैछ ।
वार्ता जारी रहँदा पनि आन्दोलनरत पक्षले बन्द जारी राखेका छन् ।
