कालीकोट, झन्डै ३८ वर्षपछि निर्माण सकिएको कालीकोटको सुनथराली विमानस्थल उद्घाटनमै सीमित छ ।
२०८० सालमा औपचारिक उद्घाटन भएको सुनथराली विमानस्थल कोटवाडामा त्यसयता एक दिन पनि हवाईजहाज आएको छैन् ।
तत्कालीन उपप्रधानमन्त्री तथा रक्षामन्त्री पूर्णबहादुर खड्का र संस्कृति, पर्यटन तथा नागरिक उड्डयनमन्त्री सुदन किराँतीलाई उद्घाटनका लागि लिएर आएको जहाज उनीहरूलाई नै लिएर फर्कियो ।
तर, त्यसपछि सुनथराली कहिल्यै आएन । उद्घाटन भएको विमानस्थलमा हप्तामा दुई दिन उडान गर्ने भनिएको थियो । तर, उद्घाटनसँगै त्यो योजना रोकियो ।
विमानस्थल निर्माण हुन पूरै ३७ वर्ष लागेको थियो । निर्माणपछि पनि औपचारिक उद्घाटन गर्न एक वर्ष कुर्न परेको थियो ।
अब औपचारिक उद्घाटन भएको एक वर्षसम्म हवाईजहाज आउने कुनै सुरसार छैन् । विमानस्थल उद्घाटनका लागि पनि सात पटक मिति तय भएको थियो ।
२०७९ चैत १५, २०८० वैशाख १ र १५, जेठ १५, असार १५, साउन १० र भदौ १३ गरी सात पटक मिति सर्दा पनि उद्घाटन हुन सकेन् ।
आठौँ पटक २०८० फागुन १४ गते औपचारिक उद्घाटन त भयो त्यसको कुनै लाभ स्थानीयलाई भएन् ।
नरहरिनाथ गाउँपालिका–१ स्थित कोटवाडामा रहेको विमानस्थल सञ्चालनका लागि गाउँपालिकाले गरेका सबै प्रयास असफल भएका छन् ।
गाउँपालिकाका अध्यक्ष नगिन्द्रबहादुर विष्टले विमानमा यात्रु नभएमा विमान कम्पनीलाई अनुदान दिनेलगायत धेरै प्रयास गरे पनि कुनै पनि विमान कम्पनीले उडान गर्न नचाहेको बताए ।
भाडादर निकै चर्को लिने विमान कम्पनीको योजना भएकाले पनि यहाँ विमान सुचारु गराउन नसकिएको अध्यक्ष विष्टको भनाइ छ ।
सुदूरपश्चिम प्रदेशको धनगढीबाट उडान भर्नेसम्मको सहमति विमान कम्पनीले गरेका थिए तर कार्यन्वयन गर्न भने नसकेको अध्यक्षको भनाइ छ ।
पुनः गाउँपालिकाकै पहलमा गत महिनादेखि हप्तामा दुई दिन उडान गर्ने भनियो । त्यो मितिमा पनि हवाईजहाज नआएपछि यहाँका नागरिक विमान चढ्ने सपना पूरा नहुने पक्कापक्की छ ।
विमानस्थलको धावनमार्गको लम्बाइ ६४० मिटर र चौडाइ २० मिटर कालोपत्रे छ । दुवैतर्फबाट जहाज अवतरण गर्न सकिने बनाइएको छ ।
१४ करोड ९० लाख रुपियाँको लागतमा विमानस्थल कालोपत्रेसमेत गरिएको छ । हालसम्म निर्माणको लागत एक अर्ब रुपियाँभन्दा माथि पुगेको अनुमान गरिएको छ ।
यति धेरै खर्च गरेर निर्माण सम्पन्न भएको विमानस्थल प्रयोगमा नआउँदा राज्यको लगानी त्यसै खेर गइरहेको छ ।
