काठमाण्डू, प्रतिनिधिसभाको बैठक आज बस्दै छ । बैठक दिउँसो १ बजेका लागि बोलाइएको छ ।
बैठकमा अध्यादेशमाथि छलफल र स्वीकृतिका लागि प्रस्ताव पेस गर्ने कार्यसूची रहेको छ । आजको बैठकमा विभिन्न ११ वटा कार्यसूची रहेका छन् ।
जसमा एउटा विधेयक र बाँकी अध्यादेशमाथि छलफल र स्वीकृतिका लागि प्रस्ताव पेस गर्ने कार्यसूची रहेको छ ।
आज आर्थिक तथा व्यावसायिक वातावरण सुधार र लगानी अभिवृद्धिसम्बन्धी केही नेपाल ऐनलाई संशोधन गर्न बनेको अध्यादेश, निजीकरण ऐन २०५० लाई संशोधन गर्न बनेको अध्यादेश, आर्थिक कार्यविधि तथा वित्तीय उत्तरदायित्व ऐन २०७६ लाई संशोधन गर्न बनेको अध्यादेश, सुशासन प्रवर्द्धन तथा सार्वजनिक सेवा प्रवाहसम्बन्धी केही नेपाल ऐनलाई संशोधन गर्ने अध्यादेश र सहकारी सम्बन्धी केही नेपाल ऐनलाई संशोधन गर्ने अध्यादेशलाई बैठकमा निर्णयार्थ पेस हुने संसद् सचिवालयले जनाएको छ ।
यी अध्यादेश सरकारले गत पुस २७ गते जारी गरेको थियो । प्रतिनिधिसभामा सत्ता पक्षको बहुमत भएपनि राष्ट्रिय सभामा भने उपेन्द्र यादव नेतृत्वको जनता समाजवादी पार्टी नेपालको साथ आवश्यक थियो ।
जसपा नेपालले भूमिसम्बन्धी अध्यादेश देशको हितमा नरहेको भन्दै फिर्ता लिनुपर्ने अडान राखेपछि सरकार अप्ठ्यारोमा परेको थियो ।
अहिले यादवलाई विश्वासमा लिएर भूमिबाहेकका बाँकी अध्यादेश अघि बढाउने तयारीमा सरकार लागेको छ ।
आज अध्यादेशहरू पेस हुने भएकाले संसद् बैठकमा अनिवार्य उपस्थित हुन नेपाली कांग्रेस र नेकपा एमालेले ह्विप जारी गरेको छ।
प्रमुख प्रतिपक्षी दल नेकपा माओवादी केन्द्रका अध्यक्ष पुष्पकमल दाहाल अध्यादेश कुनै हालतमा पास नहुने दाबी गर्दै आएका छन् ।
उनले दुई तिहाइको सरकारले अध्यादेश ल्याउनु अलोकतान्त्रिक अभ्यास भएको टिप्पणीसमेत गर्दै आएका छन् ।
यस्तै, राष्ट्रिय प्रजातन्त्र पार्टी (राप्रपा)का सांसद ज्ञानेन्द्र शाहीले अध्यादेशको विपक्षमा आफ्नो पार्टी उभिने बताए ।
उनले संसद्लाई छलेर ल्याएको अध्यादेश देश र जनताको हितमा नहुने तर्क गरे ।
