काठमाण्डू, सरकारको नेतृत्व गरिरहेको नेकपा ९एमाले०ले सडकमा प्रदर्शन गर्ने भएको छ।
प्रधानमन्त्रीको कुर्सीमा बसेका ओलीले संघीय लोकतान्त्रिक गणतन्त्रका पक्षमा जनमत सिर्जना गर्न प्रदर्शन गर्ने भएको हो।
मुलुकमा भइरहेका प्रतिगामी हर्कतविरूद्ध जनतालाई सचेत पार्न भन्दै एमालेले जनसचेतना अभियान घोषणा गरेको हो।
अभियान अन्तर्गत, एमालेले यही चैत ११ गते एकै दिन एकै समय देशैभर सबै वडामा सचेतना कार्यक्रम गर्ने बताएको छ।
चैत ११ गतेदेखि ३० गतेसम्म सबै प्रदेश र जिल्लामा प्रतिगामी हर्कतविरूद्ध जनपरिचालन र जनसचेतना कार्यक्रम गर्ने भएको हो।
सोही क्रममा चैत १८ गते धनगढी, सुर्खेत, बुटवल, पोखरा, वीरगञ्ज र दमकमा मोटरसाइकल र्याली आयोजना गर्ने तयारी गरेको छ। सोही दिन सबै जिल्लामा जिल्लास्तरीय जागरण सभा आयोजना गर्ने एमालेले बताएको छ।
चैत २४ देखि ३० गतेसम्म बागमती बाहेकका सबै प्रदेशमा प्रदर्शन गर्ने एमालेले जनाएको छ। धनगढी, सुर्खेत, बुटवल, पोखरा, वीरगञ्ज र दमकमा प्रदर्शन गर्ने तयारीमा एमाले छ।
एमाले महासचिव शंकर पोखरेलले सबै प्रदेश र जिल्ला कमिटीका अध्यक्षहरूलाई उक्त कार्यक्रम प्रभावकारी रुपमा कार्यान्वयनमा लैजान निर्देशन पनि दिएका छन्।
सत्ताको बागडोर सम्हालेर सडकमा पनि प्रदर्शन गर्नु एमालेको कमजोरी ढाक्ने प्रयासको परिणाम भएको भन्दै आलोचना हुन थालेको छ।
यस्ता छन् कार्यक्रमहरू
–प्रतिगामी कुप्रयासका विरूद्धमा पार्टीको वडाकेन्द्रित अभियानलाई जोड्दै चैत ११ गते देशभरका सबै वडाहरूमा एकसाथ जनसचेतना कार्यक्रम सञ्चालन गर्ने।
–संघीय लोकतान्त्रिक गणतन्त्रका पक्षमा नागरिक समाज र विभिन्न पक्षसँग केन्द्र र जिल्लास्तरमा अन्तर सम्वाद कार्यक्रम आयोजना गर्ने।
–चैत १८ गते काठमाडौं उपत्यका, कैलाली, सुर्खेत, रुपन्देही, कास्की, पर्सा र झापा बाहेकका सबै जिल्लामा जिल्लास्तरीय जनप्रदर्शन र जागरण सभा आयोजना गर्ने। जागरण सभा नहुने जिल्लाका हकमा वृहत मोटरसाइकल र्याली गर्ने।
–चैत २४ देखि ३० गतेभित्र धनगढी, सुर्खेत, बुटवल, पोखरा, वीरगञ्ज र दमकमा विशेष सभाको आयोजना गर्ने।
–काठमाडौं उपत्यकाको विशेष सभाको योजना पछि तय गरिने।
