मुस्ताङ, मुस्ताङको थासाङ गाउँपालिकाको छयो–कुञ्जो जोड्ने कालीगण्डकी नदीमाथि निर्माणाधीन मोटरेबल पुल निर्माण कम्पनीका ठेकेदार तीन करोड भन्दा बढी रकम लिएर फरार हुँदा आठ वर्षदेखि पुल अलपत्र परेको छ ।
२०७३ सालदेखि सुरु भएको सय मिटर लामो केवल स्टेट प्रविधिको मोटरे बल पुल दशक बित्दा समेत अलपत्र हुँदा स्थानीयवासीले सास्ती खेप्न बाध्य छन् ।
वि।स। २०७३ भदौ २२ गते तत्कालीन जिल्ला विकास समिति मुस्ताङ र स्वच्छन्द निर्माण सेवाबिच सम्झौता भएको थियो ।
निर्माण कम्पनी रकम लिएर आनन्दले काठमाडौँमा बसेको र नियामक निकायले ठेकेदारको पक्षमा उभिएर कुनै कडाइ नगर्दा स्थानीयले सास्ती भोग्नु परेको रमेश ल्वागनले बताए ।
थासाङ गाउँपालिका–५,छोयो, देउराली, कुञ्जो, ताकलुङ, प्रस्याङ, टिटीका करिब १ सय ५० घरधुरीका ७ सय जनसङ्ख्या लाभान्वित हुने पुल नबन्दा अधुरो पुललाई हेर्दै स्थानीयवासीले नजिकै रहेको झोलुङगे पुलबाट जोखिमपूर्ण यात्रा गर्न बाध्य भएको स्थानीय ल्वागनको भनाई छ ।
पुल बनाउन छाडेर रकम लिएर अनेक बहाना बनाउने गरेको छ यसले गर्दा स्थानीय उत्पादनलाई बजारीकरणमा समेत समस्या भएको उनको भनाइ छ ।
पुल नबन्दा स्थानीयलाई आवतजावतसँगै पर्यटकीय स्थल टिटी तालमा आउने पर्यटकलाई समेत सास्ती भएको छ भने नियमित उत्पादन हुने आलु, किवी, बेमौसमी तरकारीका साथै अन्य कृषि उपजको सहज बजारीकरणमा समस्या भइरहेको टाक्लुङ आधारभूत विद्यालयका शिक्षक राम परियारले बताए ।
ठेकेदारले उल्टै पुल निर्माणको क्रममा खाद्यान्नका साथै स्थानीयको ट्याक्टरको प्रयोग, मजदूरी गरेकाले समेत भुक्तानी नदिएको शिक्षक परियारले भने ।
अलपत्र पुलका बारेमा पटक पटक ठेकेदारसँग कुरा गरे पनि काम सुरु नगरेकाले अब निर्णायक आन्दोलनको विकल्प नभएको सांसद योगेश गौचनले बताए ।
ठेकेदारलाई तत्काल कालोसूचीमा राखेर जरिवानाबाट असुलउपर गरी पुनः ठेक्काको प्रक्रियामा जाने उनको भनाइ छ ।
पुलको लागत १४ करोड १९ लाख ६५ हजार ८८१ रहेको छ यी मध्ये निर्माण कम्पनीले २४ प्रतिशतभन्दा बढी रकम लिएको सांसद गौचनले बताए ।
पूर्वाधार कार्यालय मुस्ताङका सूचना अधिकारी घनश्याम रोका मगरले भने ताकेता गर्दे आएको बताए ।
तर, यस कार्यालयले आठ वर्षसम्म कुनै प्रगति नभएको र ठेकेदारसँग कुनै कडाइ गर्न सकेको छैन् ।
