पोखरा, सिन्धुलीको गोलन्जोर गाउँपालिका–६ छेत्पाबाट बेपत्ता भएका हायू परिवारका सबै १६ सदस्य पोखरामा सुरक्षित अवस्थामा फेला परेका छन् ।
उनीहरू पोखरा महानगरपालिका–३० स्थित गगनगौंडा क्षेत्रमा भेटिएको जिल्ला प्रहरी कार्यालय कास्कीका एसपी श्यामबाबु ओलियाले जानकारी दिए ।
उनका अनुसार उनीहरू सोमनाथ पौडेल र चन्द्र भण्डारीको घरमा बाँडिएर बसिरहेको अवस्थामा फेला परेका हुन् ।
हाल उनीहरूलाई इलाका प्रहरी कार्यालय सिसुवा ल्याएर आफन्तको जिम्मा लगाउने प्रक्रिया जारी छ ।
यसअघि शनिबार पोखराको लेकसाइडस्थित होटल जननीमा पुगेका उनीहरूले आइतबार होटल छाडेका थिए ।
होटल सञ्चालकका अनुसार उनीहरू तीन कोठामा बसेका थिए । प्रहरीले बेपत्ता परिवारको खोजी गर्दै जाँदा उनीहरू गगनगौंडामा फेला परेका हुन्।
घटनाबारे थप अनुसन्धान भइरहेको प्रहरीले जनाएको छ ।
