काठमाण्डू, अख्तियार दुरुपयोग अनुसन्धान आयोगले रौतहटको माधव नारायण नगरपालिकामा विद्यालय भवन निर्माण ठेक्कामा अनियमितता भएको अभियोगमा तीनजनाविरुद्ध विशेष अदालतमा मुद्दा दायर गरेको छ ।
आयोगले नगरपालिका-३ सखुअर्वामा निर्माणाधीन देवी माध्यमिक विद्यालयको भवन ठेक्का सम्बन्धी प्रक्रिया गैरकानूनी ढंगले सम्पन्न गरिएको प्रमाण फेला पारेपछि आइतबार मुद्दा दायर गरेको हो ।
उक्त प्रकरणमा तात्कालीन निमित्त प्रमुख प्रशासकीय अधिकृत प्रलब कायस्थ, लेखापाल रामबलम प्रसाद यादव, र रौतहट एडभटाइजिङ एजेन्सी प्रालिका सञ्चालक अजितकुमार कर्णको संलग्नता रहेको पाइएको आयोगका सहसचिव एवम राजेन्द्रप्रसाद पौडेलले जानकारी दिए ।
आरोपपत्रमा उल्लेख भए अनुसार आर्थिक वर्ष २०७७/७८ आर्थिक वर्षमा उक्त विद्यालय भवन निर्माणका लागि बोलपत्र आह्वान र बोलपत्र स्वीकृतिको आशयसम्बन्धी सूचना राष्ट्रियस्तरको दैनिक पत्रिकामा अनिवार्य रूपमा प्रकाशित गर्नुपर्ने कानूनी व्यवस्था हुँदाहुँदै पनि सो प्रक्रिया अपनाइएन ।
तीनै प्रतिवादीले आपसी मिलोमतो गरी ‘सिटी पोष्ट राष्ट्रिय दैनिक’ नामक सीमित प्रतिमा मात्र प्रकाशित गरिएको पत्रिकामा बोलपत्र आह्वान र स्वीकृतिको सूचना देखाएर ठेक्का प्रक्रिया अघि बढाएको आयोगले जनाएको छ ।
पत्रकार परिषद् नेपालबाट प्राप्त प्रमाणअनुसार ती सूचना वास्तविक रूपमा प्रकाशित नभएको पुष्टि भएपछि अख्तियारले सो कार्यलाई भ्रष्टाचारको श्रेणीमा परेर अनुसन्धान अघि बढाएको हो ।
प्रतिवादीले झुट्टा विवरणसहितको पत्रिकाको आधारमा रौतहट एडभटाइजिङ एजेन्सीलाई झुट्टा बील र भरपाइमार्फत २ लाख ५७ हजार ९७० भुक्तानी दिएको प्रमाण फेला परेको आयोगले जनाएको छ ।
आयोगले उक्त कार्यले माधव नारायण नगरपालिकालाई आर्थिक हानि पुर्याउने र उनीहरुले व्यक्तिगत लाभ लिने उद्देश्य राखेको ठहर गर्दै भ्रष्टाचार निवारण ऐन, २०५९ बमोजिम सजायको मागदाबीसहित आरोपपत्र दायर गरेको हो ।
अख्तियारले दायर गरेको आरोपत्रमा भनिएको छ, ‘सार्वजनिक खरिद ऐन अनुसार सूचना प्रकाशन नगरी ठेक्का प्रक्रिया सञ्चालन गर्नु गम्भीर अनियमितता हो ।
यस्तो मिलेमतोपूर्ण कार्यले स्थानीय तहको पारदर्शिता र उत्तरदायित्व दुवैमा आघात पुर्याएको छ ।’
