सुर्खेत, नेपाली कांग्रेसका कार्यवाहक सभापति पूर्णबहादुर खड्काले सरकारले उचित वातावरण बनाए आफ्नो पार्टी निर्वाचनमा सहभागी हुने बताएका छन्।
सुर्खेत कांग्रेसका पूर्वसभापति गोविन्दबहादुर मल्लको १३औँ पुण्यतिथिमा आयोजित श्रद्धाञ्जलि सभामा उनले चुनावका लागि बन्नुपर्ने सबै वातावरण बने पार्टी चुनावमा जान तयार रहेको बताएका हुन्।
हालसम्म सरकारले चुनाव गराउने भरपर्दो कामहरू भने नगरेको खड्काको भनाइ थियो।
सरकारले चुनाव गराउने हो भने पवित्र उद्देश्यसहित ‘जेनजी’ ले गरेको प्रदर्शनमा घुसपैठ गरेर लुटिएका हतियारहरू फिर्ता, प्रहरी र सुरक्षा निकायको मनोबल बढाउनुपर्नेमा जोड दिँदै उनले चुनावमा भाग लिने दलहरूलाई विश्वासमा लिई आममतदातामा सुरक्षाको प्रत्याभूति गराउनुपर्ने सुझाव दिए।
उनले सरकार चुनावको वातावरण बनाउन छोडेर पार्टीका नेताहरूमाथि पूर्वाग्रही तरिकाले लाञ्छना लगाउने, भ्रम सृजना गर्ने र अन्योललाई बढाउने काममा लागेको आरोप लगाए।
उनको भने, ‘हामी कुनै पनि खालको कानूनी प्रक्रियाबाट हुने छानबिन अनुसन्धानहरूमा खुल्ला छौँ ।
तर, सरकारमा रहेका जिम्मेवार व्यक्तिबाट भ्रम सिर्जना गर्ने, अनेक लाञ्छना लगाउनेलगायतका कार्यहरू भइरहेका छन्। यसतर्फ म सरकारको गम्भीर ध्यानाकर्षण गराउन चाहन्छु।’
कावा सभापति खड्काले पार्टीको जारी केन्द्रीय कार्यसमिति बैठकले चुनाव, पार्टीको अधिवेशन, वर्तमान परिस्थितिबारे उपयुक्त निर्णय गर्ने उल्लेख गरे।
