काठमाण्डू, नेपाल भलिबल संघ (एनभीए) यतिबेला नवौं एनभीए महिला तथा पुरुष भलिबल च्याम्पियनसिप–२०८२ को तयारीमा जुटेको छ ।
प्रतियोगिता पुस ११ देखि १९ गतेसम्म आयोजना हुँदैछ । प्रतियोगिताका खेल त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा खेलाइने छ ।
प्रतियोगितामा २० टोलीको सहभागिता रहने छ । पुरुषतर्फ १२ र महिलातर्फ आठ टोलीले उपाधिका लागि भिडन्त गर्नेछन् ।
प्रतियोगिताबाट पुरुषतर्फ शीर्ष आठ र महिलातर्फ शीर्ष ६ टोली प्रधानमन्त्री कप एनभीए लिगमा छनोट हुनेछन् ।
संघका अध्यक्ष जितेन्द्रबहादुर चन्दले प्रतियोगिताको तयारी अन्तिम चरणमा पुगेको जानकारी दिए । ‘यो वृहत् प्रतियोगिता हो ।
तयारी पनि अन्तिम चरणमा पुगेको छ । सहभागी टोलीहरू पनि उत्कृष्ट खेल पस्कन आतुर छन्,’ लोकान्तरसँगको कुराकानीमा अध्यक्ष चन्दले भने ।
उनका अनुसार, प्रतियोगितामा सहभागी हुन आउने विदेशी खेलाडीले पनि दर्शकलाई भरपूर मनोरञ्जन दिनेछन् ।
प्रतियोगितामा सहभागी तीन विभागीयबाहेक अन्य क्लबले टोलीमा तीन जना विदेशी खेलाडी समावेश गर्न पाउने प्रावधान छ ।
प्रतियोगिताको खेल तालिका बुधबार सार्वजनिक गरिने जानकारी अध्यक्ष चन्दले दिए ।
यसपटक प्रतियोगितामा गण्डकी प्रदेशको भने सहभागिता रहने छैन । राष्ट्रिय टिम छनोटप्रति असहमति जनाउँदै गण्डकीले लिग नखेल्ने निर्णय लिएको हो ।
सेन्ट्रल एसियन भलिबल संघ ९काभा० नेसन्स कप खेल्न घोषित टोलीमा घरेलु प्रतियोगितामा उत्कृष्ट प्रदर्शन गर्ने केही खेलाडीलाई स्थान नदिइएको भन्दै गण्डकीले एनभीए च्याम्पियनसिप नखेल्ने अडान लिएको हो ।
प्रतियोगितामा पुरुषतर्फ तीन विभागीय टोली त्रिभुवन आर्मी क्लब, नेपाल पुलिस क्लब र सशस्त्र प्रहरी बलको एपीएफ क्लबको सहभागिता रहने छ ।
पुरुषतर्फ रुकुम पश्चिम भलिबल प्रशिक्षण केन्द्र, जावलाखेल भलिबल प्रशिक्षण केन्द्र, मणिमुकुन्द भलिबल क्लब, हेल्प नेपाल स्पोर्ट्स क्लब, कोशी प्रदेश भलिबल संघ, बूढानीलकण्ठ भलिबल क्लब, ढोरपाटन क्लब, खिल्जी युवा क्लब र कीर्तिपुर भलिबल प्रशिक्षण केन्द्र पनि सहभागी छन् ।
यसैगरी, महिलातर्फ पनि तीन विभागीय टोलीसँगै न्यू डायमण्ड युथ स्पोर्ट्स क्लब, एभरेस्ट भलिबल क्लब, चुली युवा क्लब, सुदूरपश्चिम प्रदेश खेलकुद परिषद् र मधेश प्रदेश खेलकुद परिषद्को टोलीले सहभागिता जनाउने छन् ।
नेपाल भलिबल संघले प्रतियोगिताको खेल तालिका पनि सार्वजनिक गरिसकेको छ ।
प्रतियोगितामा सहभागी २० वटै टोलीका व्यवस्थापक र प्रशिक्षकको उपस्थितिमा बुधबार ‘टेक्निकल मिटिङ’ आयोजना गरिएको थियो ।
सोही अवसरमा खेल तालिका पनि सार्वजनिक गरिएको हो । पुरुषतर्फ हेल्प नेपाल स्पोर्टस क्लब, एपीएफ क्लब र मणिमुकुन्द भलिबल क्लब पुल ‘ए’ मा परेका छन् ।
पुल ‘बी’ मा नेपाल पुलिस क्लब, ढोरपाटन क्लब र खिल्जी युवा क्लब रहेका छन् ।
पुल ‘सी’ मा रुकुम पश्चिम ट्रेनिङ सेन्टर, बूढानीलकण्ठ भलिबल क्लब र जाउलाखेल भलिबल प्रशिक्षण केन्द्र छन् ।
पुल ‘डी’ मा भने त्रिभुवन आर्मी क्लब, कोशी प्रदेश भलिबल संघ र कीर्तिपुर भलिबल ट्रेनिङ सेन्टर परेका छन् ।
यसैगरी, महिलातर्फ पुल ‘ए’ मा एभरेष्ट भलिबल क्लब, त्रिभुवन आर्मी क्लब, चुली युवा क्लब र न्यू डायमण्ड युथ स्पोर्टस क्लब छन् ।
पुल ‘बी’ मा भने नेपाल पुलिस क्लब, सुदूरपश्चिम प्रदेश खेलकुद परिषद्, एपीएफ क्लब र मधेश प्रदेश खेलकुद परिषद् रहेका छन् ।
प्रतियोगिताको पहिलो दिन शुक्रबार पुरुषतर्फ दुई र महिलातर्फ दुई खेल हुनेछ ।
महिलातर्फको पहिलो खेल बिहान ९ः०० बजे नेपाल पुलिस क्लब र सुदूरपश्चिम प्रदेश खेलकुद परिषदबीच हुनेछ ।
महिलातर्फको दोस्रो खेल बिहान ११ः०० बजे एभरेष्ट भलिबल क्लब र आर्मी क्लबबीच खेलिने छ ।
यसैगरी, शुक्रबार पुरुषतर्फको पहिलो खेल दिउँसो १३ः०० बजे नेपाल पुलिस क्लब र ढोरपाटन क्लबबीच हुनेछ । दोस्रो खेल दिउँसो १५स्०० बजे हेल्प नेपाल स्पोर्ट्स क्लब र एपीएफ क्लबबीच खेलाइने छ ।
प्रतियोगिताको प्रारम्भिक चरणमा प्रत्येक दिन महिलातर्फ दुई र पुरुषतर्फ दुई खेल हुनेछ ।
प्रारम्भिक चरणका चारवटै खेल एउटै समयमा शुरू हुनेछन् । प्रारम्भिक चरणको खेल पुस १६ गते (डिसेम्बर ३१ तारिख) सम्म चल्नेछ ।
त्यसपछि, पुस १७ गते पुरुषतर्फको चारवटै क्वार्टरफाइनल खेल खेलाइने छ ।
महिलातर्फ भने प्रारम्भिक चरणपछि चारवटा टोली सिधै सेमिफाइनलमा पुग्नेछन् । पुस १८ गते पुरुष र महिलातर्फको सबै सेमिफाइनल खेल हुनेछन् ।
पुस १९ गते पुरुष तथा महिला दुवैतर्फको तेस्रो स्थानका लागि र फाइनल खेल खेलाइने छ ।
महिलातर्फको तेस्रो स्थानको खेल बिहान ०८ः३० बजे र पुरुषतर्फको तेस्रो स्थानको खेल बिहान १०ः३० बजे हुनेछ ।
महिलातर्फको फाइनल खेल दिउँसो १२ः३० बजे र पुरुषतर्फको फाइनल खेल दिउँसो १४:३० बजे खेलाइने छ ।
प्रतियोगिताको उद्घाटन समारोह भने शुक्रबार १४ः३० बजे शुरु हुने आयोजक संघले जनाएको छ ।
