यहि फागुन २१ गते हुन लागेकाे प्रतिनिधिसभा निर्वाचन आउन जम्माजम्मी एक हप्ता बाँकी रहेकाे बेला नेपाली कांग्रेसका पूर्वसभापति एवं पूर्वप्रधानमन्त्री शेरबहादुर देउवा सिंगापुर प्रस्थान गरेका छन् । यसपटकको चुनावी प्रक्रियाबाटै बाहिरिएका देउवा ‘स्वास्थ्य उपचार’को कारण देखाउँदै गएराति सिंगापुर प्रस्थान गरेका हुन् ।
पार्टीभित्रको आन्तरिक कलह र नयाँ नेतृत्वसँगको असन्तुष्टिका कारण चुनावी प्रक्रियाबाटै बाहिरिएका देउवा गएराति साढे ११ बजेको सिंगापुर एयरलाइन्सको उडानमार्फत त्यसतर्फ प्रस्थान गरेका हुन् । यसअघि पनि नियमित फलोअप र उपचारका लागि सिंगापुर गइरहने देउवाको यसपटकको यात्रालाई भने राजनीतिक वृत्तमा ‘चुनाव छल्ने रणनीति’का रूपमा हेरिएको छ ।
आगामी फागुन २१ गते हुन गइरहेको प्रतिनिधि सभा निर्वाचनमा यसपटक देउवाको उम्मेदवारी छैन । कांग्रेसको विशेष महाधिवेशनबाट गगन थापा सभापति बनेपछि देउवा पार्टीको नेतृत्वबाट अपदस्थ भएसँगै वर्तमान संस्थापन पक्षले टिकट नदिएपछि २०४८ सालयता डडेल्धुराबाट लगातार सात पटक अपराजित देउवा यसपटक रिङ आउट भएका हुन् ।
देउवाले सात पटक निर्वाचन जितेकाे डडेल्धुरामा अहिले उनको सट्टा उनीनिकटकै युवा नेता नैनसिंह महरले टिकट पाएका छन् । पछिल्लो समय ‘बदलिएको कांग्रेस’ को नारा दिइरहेको वर्तमान संस्थापन पक्षले देउवालाई चुनावी अभियानमा सहभागी गराउन वा रुख चिह्नमा भोट माग्ने एउटा अपिलमात्र भए पनि सार्वजनिक गर्न अनेकौँ प्रयास गरेको भएपनि देउवाले खासै चासाे नदिएकाे बताइएकाे छ ।
