अहिले मुलुकभर पश्चिमी तथा स्थानीय वायुको प्रभाव रहेकाले देशका विभिन्न भागमा माैसम बदलीसँगै वर्षा भएकाे छ । जल तथा मौसम पूर्वानुमान महाशाखाका अनुसार जसका कारण अहिले पनि गण्डकी, बागमती र कोशी प्रदेशका केही स्थानमा वर्षा भइरहेको बताइएकाे छ ।
आज दिउँसो कोशी, बागमती, गण्डकी र कर्णाली प्रदेशका हिमाली तथा पहाडी भूभागमा सामान्यदेखि पूर्ण बदली रहनेछ भने कोशी, बागमती, गण्डकी र कर्णाली प्रदेशका हिमाली तथा पहाडी भूभागका केही स्थानमा मेघगर्जन तथा चट्याङसहित मध्यम वर्षाको सम्भावना रहेकाे छ ।
त्यसैगरि मधेस प्रदेशसहित लुम्बिनी र सुदूरपश्चिम प्रदेशका हिमाली तथा पहाडी भूभाग तथा कोशी प्रदेशको तराई क्षेत्रका एकदुई स्थानमा पनि मेघगर्जन तथा चट्याङसहित वर्षा हुन सक्ने महाशाखाले जनाएको छ ।
आज राति कोशी, बागमती र गण्डकी प्रदेशका हिमाली तथा पहाडी भूभागमा सामान्य बदली रहनुका साथै कर्णाली प्रदेशको हिमाली भूभाग र मधेश प्रदेशमा आंशिक बदली रहने छ । बाँकी पहाडी तथा तराई भूभागमा मौसम मुख्यतया सफा रहने पनि महाशाखाले जनाएकाे छ । त्यस्तै तराई क्षेत्रका केही स्थानमा हुरी चल्न सक्ने भएकाले सावधानी अपनाउन अनुरोध गरिएको छ ।
