अहिले नेपालमा पश्चिमी, स्थानीय वायु र देशको पूर्वी भूभाग नजिक रहेको न्यून चापीय प्रणालीको संयुक्त प्रभावका कारण पहाडी र हिमाली भेगमा वर्षा हुँदा तराईमा गर्मी बढ्न सुरु भएकाे छ । अहिले पनि केही भू-भागमा मेघगर्जन र चट्याङ्गसहित हल्का वर्षा भइरहेकाे छ ।
जल तथा मौसम पूर्वानुमान महाशाखाका अनुसार काेशी,बागमती प्रदेशका एक-दुई स्थानमा मेघगर्जन र चट्याङ्गसहित हल्का वर्षा भइरहेको छ भने मधेश प्रदेशमा आंशिक बदली हुनुका साथै तराई क्षेत्रकाे मौसम मुख्यतया सफा रहेकाे छ ।
दिउँसो कोशी, मधेश, बागमती र गण्डकी प्रदेश लगायत बाँकी हिमाली तथा पहाडी भूभागमा साधारणतया बदली रहने र तराईका भूभागमा आंशिक बदली हुने सम्भावना रहेकाे छ । त्यसैगरि कोशी प्रदेश लगायत बागमती र गण्डकी प्रदेशका हिमाली तथा पहाडी भूभागका केही स्थानहरूमा पानी पर्ने सम्भावना छ भने सुदूरपश्चिम र लुम्बिनी प्रदेशका तराई भूभागमा भने अत्यधिक गर्मीकाे सम्भावना रहेकाे छ ।
आज राती देशभर साधारणतया बादल लाग्ने छ भने बागमती, गण्डकी, लुम्बिनी, कोशी, मधेश, कर्णाली र सुदूरपश्चिम प्रदेशका थोरै स्थानहरूमा मेघगर्जन र चट्याङसहित मध्यमसम्मको वर्षा र हिमपात हुन सक्ने महाशाखाले जनाएकाे छ । सुदूरपश्चिम, कर्णाली र लुम्बिनी प्रदेशका तराई तथा पहाडी भूभागका साथै देशका बाँकी तराईका थोरै स्थानहरूमा हावाहुरी चल्ने सम्भावना रहेकाे महाशाखाले जनाएकाे छ ।
