पछिल्लो २४ घण्टाभित्र ट्राफिक नियम उल्लंघन गर्ने २ हजार ५५० जना सवारीचालक कारबाहीमा परेका छन् । ट्राफिक प्रहरीकाे कारबाहीबाट राज्यकोषमा १७ लाख २४ हजार ५०३ रुपैयाँ राजस्व दाखिला भएको छ ।
उपत्यकाका विभिन्न स्थानमा थालेको नियमित तथा बिशेष चेकिङका क्रममा चालकहरूलाई कारबाही गरिएकाे काठमाडौं उपत्यका ट्राफिक प्रहरी कार्यालयले जनाएकाे छ । ट्राफिक प्रहरीले गरेकाे कारबाहीमा निषेधित क्षेत्रमा हर्न बजाउने १०८ र मादकपदार्थ सेवन (मापसे) गरी सवारी चलाउने १०२ जना चालक रहेका छन् ।
त्यसैगरि लेन अनुशासन पालना नगर्ने ५६ जना, सवारीसाधनको यान्त्रिक अवस्था जाँच नगरी सडकमा निकाल्ने ३५ जना र निर्धारित मापदण्डभन्दा बढी धुवाँ फालेर वातावरण प्रदुषण गर्ने १४ जना चालक पनि कारबाहीमा परेका छन भने सबैभन्दा बढी अन्य विविध ट्राफिक नियम पालना नगर्ने १ हजार ७४६ जना रहेका छन् ।
त्यसैगरी तीव्र गतिमा सवारीसाधन हुइँक्याउने २०७ जना, नियमविपरीत ‘राइड सेयरिङ’ गर्ने १४२ जना र ट्राफिक सङ्केत बत्ती (रेड लाइट) उल्लंघन गर्ने १४० जना चालक पनि कारबाहीमा परेका छन् । उपत्यकाको यातायात प्रणालीलाई सुरक्षित र व्यवस्थित बनाउन तथा सडक दुर्घटना न्यूनीकरण गर्न ट्राफिक प्रहरीले चेकिङ र कारबाहीलाई अझै तीव्र पार्ने जनाएको छ ।
