काठमाण्डू, नेपाली चलचित्र ‘गौंथली’ ले घरेलु बक्स अफिसमा उल्लेखनीय सफलता हासिल गर्दै सर्वाधिक कमाउने नेपाली फिल्महरूको सूचीमा सातौं स्थान बनाएको छ।
निर्देशक कपिल रिजाल को निर्देशनमा बनेको यस फिल्मले शुक्रबार मध्यान्हसम्म देशभरबाट १६ करोड ७८ लाख रुपैयाँ ग्रस कलेक्सन गरेको छ।
सकारात्मक दर्शक प्रतिक्रिया र मुखैमुख फैलिएको प्रशंसाका कारण फिल्मको व्यापार निरन्तर उकालो लागिरहेको छ।
यही सफलतासँगै ‘गौंथली’ ले ‘छक्कापञ्जा–१’, ‘छक्कापञ्जा–२’, ‘छक्कापञ्जा–५’, ‘कोहिनुर’, ‘महाजात्रा’ र ‘आबाट आमा’ जस्ता चर्चित नेपाली चलचित्रहरूको कमाइलाई पछि पारेको छ।
हाल कमाइका आधारमा ‘गौंथली’ भन्दा अगाडि ‘पूर्णबहादुरको सारंगी’, ‘कबड्डी–४’, ‘१२ गाउँ’, ‘परान’, ‘छक्कापञ्जा–४’ र ‘जारी’ मात्र रहेका छन्।
चलचित्र विश्लेषकहरूका अनुसार हाल प्रतिस्पर्धामा ठूला नेपाली फिल्म नरहेको, साथै दर्शकबाट निरन्तर सकारात्मक प्रतिक्रिया पाइरहेकाले ‘गौंथली’ को कमाइ अझै केही सातासम्म मजबुत रहने सम्भावना छ।
यही लय कायम रहे आगामी साताभित्र यसले ‘जारी’ को व्यापारिक रेकर्डसमेत उछिन्ने अनुमान गरिएको छ।
फिल्मका निर्माता सुमन गिरी भान्जा ले ‘गौंथली’ को सफलताले केवल निर्माण टिमलाई मात्र होइन, समग्र नेपाली फिल्म उद्योगलाई नै नयाँ ऊर्जा दिएको बताएका छन्।
उनका अनुसार नेपाली कथावस्तु र गुणस्तरीय प्रस्तुतिलाई दर्शकले खुलेर साथ दिएको यो सफलता नेपाली सिनेमाका लागि सकारात्मक संकेत हो।
