नेपाल आयल निगमले आजदेखि खाना पकाउने एलपी ग्यासको बिक्री-वितरण नियमित बनाउने भएको छ । निगमले एक सूचना जारी गर्दै भदौ १ गतेदेखि सम्बन्धित ग्यास उद्योगले नियुक्त गरेका विक्रेतामार्फत नियमित प्रक्रियाअनुसार ग्यास वितरणको व्यवस्था मिलाइएको जनाएको हो ।
जसअनुसार उपभोक्ताले आफूलाई पायक पर्ने ग्यास विक्रेतासँग सम्पर्क गरी ग्यास खरिद गर्न निगमले आग्रह गरेको छ । सूचना अनुसार ग्यास उद्योगहरूले दैनिक बिक्री गर्ने विक्रेता तथा वितरकको नाम, ठेगाना, सम्पर्क नम्बर र सिलिन्डर सङ्ख्यासहितको विवरण प्रत्येक दिन बिहान ९ बजेभित्र निगमलाई उपलब्ध गराउनु पर्नेछ ।
त्यसैगरि विक्रेता तथा वितरकले बिक्री गरेको ग्यासको परिमाणसँगै उपभोक्ताको नाम र सम्पर्क नम्बरसहितको विवरण दैनिक रूपमा तयार गरी सम्बन्धित उद्योगलाई अनिवार्य बुझाउनुपर्ने व्यवस्था गरेको र उद्योगले उक्त विवरण सोही दिन निगमलाई उपलब्ध गराउनुपर्ने बताइएकाे छ ।
निगमले ग्यास बिक्री–वितरण गर्दा घरायसी प्रयोजनका उपभोक्तालाई उच्च प्राथमिकतामा राख्न सम्बन्धित उद्योग तथा विक्रेतालाई निर्देशन दिएको छ । निगमले ग्यास ढुवानी र वितरण कार्यलाई सहज बनाउन गृह मन्त्रालयमार्फत सम्बन्धित जिल्ला प्रशासन कार्यालयसँग समन्वय गर्न अनुरोध समेत गरेको छ ।
त्यसैगरि ग्यास वितरणको अवस्था अनुगमन गर्न वाणिज्य, आपूर्ति तथा उपभोक्ता संरक्षण विभागसँग समन्वय गरी निगमबाट खटाइएका जनशक्तिसहितको संयुक्त टोली परिचालन गरिने छ भने नजिकको विक्रेताबाट ग्यास नपाएका तथा तत्काल आवश्यक परेका उपभोक्ताले निगमको ‘क्विक रेस्पोन्स टिम’मा सम्पर्क गर्न सक्नेछन् । त्यसका लागि निगमले ९८५१४५५१२४ र ९८५१४५५१२८ नम्बर उपलब्ध गराएको छ ।
