काठमाण्डू, घरेलु मैदानमा जारी साफ यू–२० च्याम्पियनसिप फुटबलको सेमिफाइनलमा नेपालले भुटानको सामना गर्दैछ ।
यी दुई टिमबीचको खेल आज अपरान्ह ३ बजेदेखि सातदोबाटोस्थित एन्फा कम्प्लेक्समा सुरु हुनेछ ।
नेपाल अपराजित रहेर सेमिफाइनलमा प्रतिस्पर्धा गर्न लागेको हो । नेपालले समूह चरणमा श्रीलंकालाई १–० तथा बंगलादेशलाई २–१ गोल अन्तरले हरायो ।
समूह ‘ए’ विजेताको रूपमा सेमिफाइनल खेल्न लागेको नेपाल भुटानलाई पनि हराएर फाइनलको यात्रा गर्न चाहन्छ ।
उता भुटानी टोली पनि राम्रो प्रदर्शन गरिरहेको छ । उसले ग्रुप स्टेजको पहिलो खेलमा गत संस्करण विजेता भारतविरुद्ध एक गोलको मात्र सामना गर्दा माल्दिभ्सलाई २–१ ले हरायो ।
भुटान समूह ‘बी’ को उपविजेताको हैसियतामा सेमिफाइनलमा नेपालसँग भिड्न लागेको हो ।
ऊ अब आयोजक टिम नेपाललाई पनि घरेलु मैदानमा स्तब्ध पार्दै पहिलोपटक फाइनलको यात्रा गर्न चाहन्छ ।
भुटानले हालसम्म दुईपटक उमेर समूहको सेमिफाइनल खेल्दा फाइनलको टिकट काट्न सकेको छैन ।
उसले सन् २०१७ र २०१९ को सेमिफाइनल खेलेको थियो । जहाँ भुटान दुवै सेमिफाइनलमा चौथो भयो ।
हालसम्म २० वर्षमुनिको साफमा नेपाल र भुटानले तीन खेलमा एकअर्काको सामना गरेका छन् ।
जसमा भुटानले दुई र नेपालले एक खेल जितेको विगत छ । यसरी हेर्दा ‘हेड टु हेड’ मा नेपालविरुद्ध भुटान हाबी देखिन्छ ।
पहिलो संस्करण अर्थात् सन् २०१५ को साफमा भुटानविरुद्ध नेपालले ३–१ गोल अन्तरको फराकिलो जीत निकाल्यो ।
उक्त खेलमा विमल घर्ती मगरले ह्याट्रिक गरे । सो संस्करणमा नेपालले फाइनलमा भारतलाई पेनाल्टी सुटआउटमा हराउँदै उपाधि जित्यो ।
यस्तै, सन् २०१७ को साफमा भने भुटानविरुद्ध नेपाल पराजित भयो । उक्त खेलमा भुटानसँग नेपाल १–० ले पराजित भएको हो ।
सो खेलमा भुटानले पेनाल्टीमार्फत गोल गर्दै नेपाललाई हरायो । भुटानसँग हारेको उक्त संस्करणमा फाइनलमा भने नेपालले भारतलाई २–० ले हरायो । भारतविरुद्ध नेपालको जितमा दुवै गोल दिनेश हेन्जनले गरे ।
सन् २०१९ मा भने नेपालले भुटानसँग ३–० को फराकिलो हार बेहोर्यो । उक्त संस्करणमा नेपाल समूह चरणबाटै बाहिरियो ।
सन् २०२२ को साफमा भने भुटानले भाग लिएन । उक्त संस्करणमा नेपालले भारतसँग ८–० को लज्जास्पद हार बेहोर्यो ।
नेपाल सो चौथो संस्करणको साफमा सेमिफाइनलबाटै बाहिरियो । यस्तै, नेपाल सन् २०२३ को साफमा पनि सेमिफाइनलसम्म मात्र पुग्न सक्यो ।
उक्त संस्करणमा नेपाल पेनाल्टीसुटआउटमा भारतसँग पराजित भयो । नेपाली टिमसामु यसपटक सन् २०१९ को ३–० को हारको बदला लिँदै भुटानलाई हराएर फाइनल पुग्ने मौका छ ।
जारी साफमा नेपालका लागि निराजन धामीले दुई र समीर तामाङले एक गोल गरेका छन् ।
निराजनले दुई म्याच खेल्दा दुवैमा गोल गरेका छन् । यस्तै, समीरले बंगलादेशविरुद्ध गोल गरेका थिए । उनीहरू टिमका सर्वाधिक अनुभवी खेलाडीमध्येमा पर्छन् ।
समीरले त नेपालको सिनियर टिमबाट डेब्यूसमेत गरिसकेका छन् । उनले गत मार्चमा बहराइनविरुद्धको विश्वकप छनोट खेलेमा डेब्यू गरेका थिए ।
यस्तै, निराजनले ‘ए’ डिभिजनका साथै नेपाल सुपर लिगसमेत खेलिसकेका छन् ।
उनीहरू अब आफ्नो अनुभवको सदुपयोग गर्दै नेपाललाई फाइनलमा पुर्याउन पूरा कोशिस गर्ने छन् ।
