काठमाण्डू, नेपाली कांग्रेसमा महामन्त्री गगन थापाले कुनै बेला वीपी कोइरालाले राखेका विचारलाई लिएर आजको अर्थतन्त्र र समयको चुनौतीको समाधान गर्न नसकिने बताएका छन् ।
मंगलबार नेपाली कांग्रेसको पेसागत तथा बुद्धिजीवी विभागले आयोजना गरेको ‘वीपीको समाजवाद आजको सान्दर्भिकता’ विषयक विचार गोष्ठी कार्यक्रममा बोल्दै उनले विगतमा वीपी कोइरालाले भनेको कुरालाई लिएर आजको अर्थतन्त्र र समयको चुनौतीको समाधान गर्न खोजियो भने ठिक ठाउँमा पुग्न नसकिने बताए ।
उनले भने,हामीले सधैँभरी वीपी कोइरालाको सन्दर्भमा पटक–पटक एउटा कुरा कमजोरी गर्दै आएका छौँ ।
वीपीको फन्डामेन्टल, आधारभूत कुरालाई छोडेर कुनै बेला उहाँले भन्नुभएको कुरालाई लिएर हामीले आजको अर्थतन्त्र, समाज र समयको चुनौतीको समाधान गर्न खोज्यौँ भने ठिक ठाउँमा पुग्दैनौँ ।
वीपी कोइरालाको आधारभूत स्वतन्त्र समानताको कुरा सबैले बराबर अवसर पाउने कुराको सन्दर्भमा उहाँको विचार अबको एक सय वर्षसम्म पनि सही हुनेछ ।’
उनले जनकपुर चुरोट कारखाना, वीरगन्ज चिनी उद्योग, हेटौँडा कपडा उद्योगलाई गिरिजाप्रसाद कोइरालाको सरकारले निजीकरण गर्ने भनेर गरेको निर्णय वीपीको समाजवादको आँखाबाट हेर्दै गर्दा ठिक थियो कि थिएन भन्ने प्रश्न आज पनि उठ्ने गरेको बताए ।
यस विषयमा नेपाली कांग्रेसको नेता कार्यकर्ताहरूमा नै अन्यौलता रह्यो भने सबै नेपालीलाई अन्योल रहने भन्दै निर्णय सही भएको प्रस्ट पारे ।
उनले भने, जनकपुर चुरोट कारखाना, वीरगन्ज चिनी उद्योग, हेटौँडा कपडा उद्योग ४८ सालको गिरिजाप्रसाद कोइरालाको सरकारले निजीकरण गर्ने गरेको निर्णय बिपीको समाजवादको आँखाबाट हेर्दै गर्दा ठिक थियो कि थिएन भनेर समीक्षा गर्नुपर्छ ।
हामी अहिले पनि नेपाली कांग्रेसको नेता कार्यकर्ताहरू कन्फ्यूज भयौँ भने अरूलाई पनि कन्फ्यूजमा पार्छौँ । त्यो सत प्रतिशत नै सही थियो ।’
महामन्त्री थापाले अबको कांग्रेसको ठूलो सफलता भनेको कत्तिको युवाहरूलाई देशमा रोजगारी दिन सक्यो भन्ने नै रहने बताए ।
कांग्रेस सभापति शेरबहादुर देउवाको प्रमुख आथित्यतामा भएको कार्यक्रम कांग्रेस केन्द्रीय सदस्य एवम् विभागीय प्रमुख डिला संग्रौलाको अध्यक्षतामा सम्पन्न भएको हो ।
