काठमाण्डू, कीर्तिपुरको मेयरमा कांग्रेसका मेयर उम्मेदवार कृष्णमान डंगोलले आफ्नो अग्रता कायम राखेका छन् ।
प्राप्त पछिल्लो मत परिणाम अनुसार डंगोलले कुल १३१३ मत ल्याएर सहज अग्रता बनाएका हुन् ।
एमालेका डा। सुरेन्द्र मानन्धरले ९७८ मत ल्याएका छन् । यस्तै, माओवादीका शिवशरण महर्जनलाई ७१४ मत प्राप्त भएको छ ।
उनलाई एमाले र माओवादी उम्मेदवारहरूले पछ्याइरहेका छन् । कीर्तिपुरमा वडा नम्बर १ को मतगणना सकिएर अहिले वडा नम्बर ४ को मतगणना भइरहेको छ ।
वडा नम्बर १ मा कांग्रेस पहिलो हुँदा स्वतन्त्र उम्मेदवार राजमान महर्जन दोस्रो स्थानमा रहेका थिए । माओवादी तेस्रो हुँदा एमाले चौथोमा खस्किएको छ ।
वडा नम्बर ४ को गणनापछि भने एमाले दोस्रो स्थानमा उक्लिएको हो । अहिलेसम्म कुल ४९०९ मत गणना सम्पन्न भइसकेको छ ।
कीर्तिपुरमा तीन ठूला दलबाहेक दुई स्वतन्त्र उम्मेदवारले पनि उल्लेख्य मत ल्याइरहेका छन् ।
कैँची चुनाव चिन्ह भएका दिनेशकुमार अधिकारीले ६३१ मत ल्याउँदा केटा र केटी चुनाव चिन्ह भएका राजमान महर्जनलाई ५२० मत प्राप्त भएको छ ।
यस्तै राष्ट्रिय प्रजातन्त्र पार्टीका उम्मेदवार ध्रुव महर्जनले अहिलेसम्म २२७ मत ल्याएका छन् । अन्य उम्मेदवारलाई उल्लेख्य मत आएको छैन ।
