काठमाण्डू, विराटनगर किंग्सले पहिलो संस्करणको नेपाल प्रिमियर लिग (एनपिएल) मा दोस्रो जीत निकालेको छ । विराटनगरले दोस्रो जीत निकाल्नेक्रममा शुक्रबार चितवन राइनोजलाई ५१ रनले हरायो ।
चितवनले भने आजको खेलमा खराब ब्याटिङ गर्यो । विराटनगरले दिएको १ सय ८२ रनको लक्ष्य पछ्याएको चितवनले निर्धारित २० ओभरमा ६ विकेट गुमाएर १ सय ३० रन मात्र बनाउन सक्यो ।
उसका लागि अमर रौटेलाले ४२, सन्तोष कार्कीले २८, कप्तान कुशल मल्लले २५ र रवि बोपाराले २० रन जोडे ।
विराटनगरका लागि कप्तान सन्दीप लामिछानेले दुई, सुवास भण्डारी, लोकेश बम, बसिर अहमद र क्रिस सोलले एक/एक विकेट लिए ।
त्यसअघि कीर्तिपुरस्थित त्रिवि मैदानमा टस जितेर ब्याटिङ रोजेको विराटनगरले निर्धारित २० ओभरमा ५ विकेट गुमाएर १ सय ८१ रन बनायो ।
उसका लागि युवा अलराउन्डर बसिर अहमदले उत्कृष्ट पारी खेले । ४४ बलको सामना गरेका उनले चार छक्का र चार चौकासहित अविजित ६८ रनको पारी खेलेका हुन् ।
यस्तै, मार्टिन गप्टिलले ३५ बलमा चार छक्का र एक चौकासहित ४५ रन जोडे । त्यस्तै, राजेश पुलामी मगरले २० बलमा तीन छक्का र एक चौकाको मद्दतमा अविजित ३३ रनको आक्रामक पारी खेले ।
यस खेलमा बसिर र राजेशले उत्कृष्ट फिनिसिङ गरे । उनीहरूबीच अन्तिम ६ ओभरमा ८१ रनको साझेदारी साझेदारी बन्यो ।
चितवनका लागि रिजन ढकालले दुई, सोहेल तनवीर, बसिल हमीद र कुशल मल्लले एक/एक विकेट लिए ।
यो जितपछि विराटनगर अंक तालिकाको पाँचौं स्थानमा उक्लिएको छ । फराकिलो जितपछि विराटनगरले प्लेअफ सम्भावना पनि जीवितै राखेको छ ।
विराटनगरले ६ म्याच खेल्दा चारमा हार तथा दुई खेलमा जीत निकालेको छ । यस्तै, चितवनले ६ म्याच खेल्दासम्म तीनमा जीत र तीन खेलमा हारको सामना गरेको छ ।
प्लेअफ सम्भावना बलियो बनाउन चितवन पनि जित्नैपर्ने दबाबमा छ । ऊ अहिले ६ अंकसहित तालिकाको चौथो स्थानमा छ ।
