काठमाडौं, आइसिसी यू–१९ विश्वकपका लागि दक्षिण अफ्रिकामा रहेको नेपाली युवा टिमले अभ्यास खेलमा लगातार तेस्रो जीत निकालेको छ ।
तेस्रो जीत हात पार्नेक्रममा शनिबार भएको आधिकारिक वार्मअप खेलमा स्कटल्याण्डलाई डकवर्थ लुईस पद्धतिको आधारमा ७ विकेटले हरायो ।
नेपालले पहिलो अनौपचारिक अभ्यास खेलमा स्कटल्याण्डलाई १३५ तथा दोस्रो म्याचमा नामिबियालाई ६ रनले हराएको थियो ।
तेस्रो खेलमा स्कटल्याण्डले दिएको १ सय १५ रनको सामान्य लक्ष्य पछ्याएको नेपालले २९.१ ओभरमा ९९-३ को अवस्थामा वर्षाको कारण खेल रोकिएको थियो ।
त्यसपछि पानी नरोकिएपछि डकवर्थ लुईस पद्धतिअनुसार नेपाललाई विजेता घोषणा गरियो ।
नेपालका अर्जुन कुमाल ३३ र आकाश त्रिपाठीले २९ रन बनाए । त्यसअघि टस जितेर पहिला ब्याटिङ रोजेको स्कटल्याण्ड ४४.४ ओभरमा १ सय १४ रनमै अलआउट भयो ।
उसका लागि उजेर अहमदले ३१ र ह्यारी आर्मस्ट्रङले २३ रन बनाए । स्कटल्याण्डलाई सस्तैमा समेट्नेक्रममा नेपालका गुलशन झा र तिलक भण्डारीले तीनरतीन विकेट लिए ।
नेपालले अब अन्तिम वार्मअप खेल मंगलबार वेस्ट इण्डिजसँग खेल्नेछ । त्यसपछि नेपालले विश्वकपमा २१ जनवरीमा न्यूजील्याण्ड, २४ जनवरीमा पाकिस्तान तथा २६ जनवरीमा अफगानिस्तानसँग खेल्ने तालिका छ ।
