काठमाण्डू, पार्टी विधानका विषयमा छलफल गर्न नेकपा एमालेको केन्द्रीय कमिटीको बैठक आज बस्दै छ।
सोमबार बिहान ११ बजे पार्टी केन्द्रीय कार्यलय च्यासलमा बस्ने बैठकमा आगामी विधान महाधिवेशनका प्रष्तुत हुने विधानको मस्यौदा प्रस्तुत गर्ने कार्यसूची छ।
पार्टी स्थायी कमिटी सदस्य तथा प्रचार तथा प्रकाशन विभागका प्रमुख राजेन्द्र गौतमका अनुसार विधान मस्यौदा समितीका संयोजक पार्टी उपाध्यक्ष विष्णुप्रसाद पौडेलले सचिवालय र पोलिटव्यूरोले पास गरेको विधान केन्द्रीय कमिटी बैठकमा गर्नेछन्।
एमाले सचिवालय र पोलिटव्यूरो कमिटीको बैठक सकिएपछि केन्द्रीय कमिटी बैठक बस्न लागेको हो।
प्रस्तावित विधानका बारेमा इच्छुक केन्द्रीय कमिटी सदस्यलाई बढीमा तीन मिनेटमा आफ्ना धारणा राख्न समय उपलब्ध गराउने तयारी छ।
सचिवालय, स्थायी कमिटी र पोलिटव्यूरो सदस्यहरुले उपल्ला कमिटीमै धारणा राखिसकेका कारण केन्द्रीय सदस्यहरुले मात्र आजको बैठकमा बोल्ने अवसर पाउने गौतमले जानकारी दिए।
आजको बैठकको सुरुमा पार्टी अध्यक्ष एवं प्रधानमन्त्री केपी ओलीले समसामयिक राजनीतिक विषय, सरकारको एकवर्ष र पार्टीको सचिवालय र पोलिटव्यूरो बैठकका निर्णयका सन्दर्भमा मन्तव्य राख्ने छन्।
यसैगरी महासचिवले सागठनिक अवस्थाका बारेमा जानकारी गराएपछि बैठक विधानको विषयको छलफलमा प्रवेश गर्ने छ।
एमालेमा सचिवालय, स्थायी कमिटी र पोलिटव्यूरो बाहेक करिब २३० जना केन्द्रीय सदस्य छन्।
बैठक आज र भोलीमा सक्ने भनिए पनि सबै केन्द्रीय सदस्यले धारणा राख्ने समय लिएमा पर्सीसम्म लम्बिने आँकलन छ।
पार्टीको साउन १ गते बसेको सचिवालय, साउन २ र ३ गते बसेको पोलिटब्युरो बैठकले ७० वर्षको उमेर हद र एउटै पदमा दुई कार्यकालको प्रावधान हटाइको छ।
उपाध्यक्ष पौडेलले विधानमा यी विषयहरु पनि समेटेर केन्द्रीय कमिटीम प्रस्तुत गर्नेछन्।
केन्द्रीय कमिटीले पास गरेको विधान मातहका कमिटीमा थप सुझावका लागि पठाउने तयारी एमालेको छ।
मातहतका कमिटीबाट आएका सुझावहरुलाई समेटेर महाधिवेशनमा प्रस्तुत गरिने गौतमले जानकारी दिए।
भदौको २० देखि २२ गतेसम्म ललितपुरको गोदावरीमा एमालेको विधान महाधिवेशन आयोजना हुनेछ।
