एजेन्सी, अफगानिस्तानविरुद्धको टी–२० सिरिज एक खेल अगावै भारतले जितेको छ ।
गएराति भएको खेलमा अफगानिस्तानलाई ६ विकेटले हराउँदै भारतले तीन खेलको सिरिज एक खेल अगावै २–० ले जितेको हो ।
पहिलो खेलमा भारतले अफगानिस्तानलाई ६ विकेटले नै हराएको थियो ।
दोस्रो खेलमा अफगानिस्तानले दिएको १ सय ७३ रनको लक्ष्य भारतले १५.४ ओभरमा ४ विकेट गुमाएर पूरा गर्यो । उसका लागि यशस्वी जैसवालले ३४ बलमा ६ छक्का र ५ चौकासहित सर्वाधिक ६८ रन बनाए ।
यस्तै, शिवम दुबेले ३२ बलमा ५ चौका र ४ छक्कासहित अविजित ६३ रनको इनिङ खेले ।
विराट कोहलीले २९ रन जोड्दा रिंकु सिंह ९ रनमा अविजित रहे । कप्तान रोहित शर्मा र विकेटकिपर जितेश शर्मा भने शून्यमै आउट भए ।
अफगानिस्तानका लागि करिम जनतले दुई र नवीन उल हक तथा फजलहक फारुकीले एक/एक विकेट लिए ।
त्यसअघि इन्दौरस्थित होल्कर क्रिकेट स्टेडियममा टस हारेर ब्याटिङको निम्तो पाएको अफगानिस्तानले निर्धारित २० ओभरमा सबै विकेट गुमाएर २ सय ७२ रन बनायो ।
उसका लागि गुलबदिन नाइबले ५७, नजिबुल्लाह जाद्रानले २३, मुजीबउर रहमानले २१ र करिम जनतले २० रन बनाए ।
भारतका लागि अर्शदीप सिंहले तीन, रवि विश्नोई र अक्षर पटेलले दुई/दुई तथा शिवम दुबेले एक विकेट लिए ।
भारत र अफगानिस्तानबीचको अन्तिम खेल बुधबार बैंगलोरमा हुनेछ ।
