काठमाडौं, आज माघ महिनाको पहिलो दिन अर्थात् माघे सङ्क्रान्ति पर्व देशभर मनाइँदै छ ।
आजै देखि सूर्य धनु राशिबाट मकर राशिमा प्रवेश गर्ने भएकाले माघ १ गतेलाई मकर सङ्क्रान्ति पनि भनिन्छ ।
माघे सङ्क्रान्ति पर्व स्नान, जप, तप, ध्यान साधना, दानआदि गरी मनाइँदै छ । माघे सङ्क्रान्तिका दिन देवघाट, त्रिशूली, कालीगण्डकी, वाग्मती, इन्द्रावती, त्रिवेणी, रिडी, झापाको कन्काई लगायतका स्थानमा माघ स्नान गर्ने भक्तजनको बिहानैदेखि भीड लागेको छ ।
ती ठाउँमा आज विशेष मेला समेत लागेको छ । माघे सङ्क्रान्तिका दिन घ्यू, चाकु, तिलका परिकार, खिचडी नखाएमा , दान गरिएन भने अनि जलाशयमा गई स्नान नगर्ने, ध्यान नगर्ने व्यक्ति रोगी हुने मान्यता छ । त्यही भएर पनि आजका दिन सनातन संस्कृतिमा विश्वास गर्नेहरुले स्नान, ध्यान, जप र दान गर्ने गर्छन् ।
त्यस्तै,आजका दिन घ्यु, चाकु, तिलका लड्डु, खिचडी, सखरखण्ड, तरुललगायत परिकार खाने चलन छ । मकर सङ्क्रान्तिमा शरीरमा तिलको तेलले मालिस गर्दा दूषित पदार्थ बाहिर निस्कन्छ भन्ने विश्वास छ ।
तिलको तेलले मालिस गर्दा शरीरका नाडी र हड्डीलार्ई स्वस्थ राख्न सकिने आयुर्वेद शास्त्रीय मान्यता छ ।
तराई मधेसमा भने माघ १ गतेलाई नहान अर्थात् नुहाउने पर्वका रुपमा मनाउने गरिन्छ । आज बिहानै तीर्थस्थलमा गई स्नान गरेर तिल दान गर्नाले सुन दान गरे सरहको पुण्य प्राप्त हुने धार्मिक विश्वास छ ।
माघ १ गतेदेखि सूर्य उत्तरायण हुने भएकाले आजदेखि दिनभन्दा रात छोटा हुँदै जाने छन् ।
माघे सङ्क्रान्ति अर्थात् माघी पर्वको अवसरमा सरकारले आज देशभर सार्वजनिक बिदा दिएको छ ।
