काठमाण्डू, सेफ्स एसोसिएसन अफ नेपालले खीर प्रबर्द्धन गर्न खीर खाने कार्यक्रमको आयोजना गरेको छ ।
बिहीबार साउन १५ अर्थात खीर खाने पर्वको पावन अवसरमा रानीबारी–३ स्थित संस्थाको केन्द्रीय कार्यालयमा उक्त कार्यक्रम आयोजना गरेको हो।
खीर खाने कार्यक्रममा एसोसिएसनका अध्यक्ष रेशमकुमार लामा तामाङले नेपालमा मनाइने सबै मेला पर्व तथा रितिरिवाज र संस्कृतिको आफ्नै विशेषता र महत्व रहेको बताए ।
खीर खाने मौलिक चाडपर्व मनाउन पर्नेमा जोड दिदैं अध्यक्ष लामाले यस्ता कार्यक्रमले आपसी भेटघाट र सद्भाव बढाउने बताए ।
कार्यक्रममा संस्थापक अध्यक्ष पुष्प थापा पूर्वअध्यक्ष गोविन्द नरसिंह केसी, सूर्यकिरण श्रेष्ठ लगायतले हाम्रा चाडपर्वहरू सांस्कृतिका खानी भएकाले त्यस्ता पर्वमा हुने गरेका नकारात्मक कुरालाई छोड्दै सकारात्मक पक्षलाई मनन गर्नुपर्नेमा जोड दिएका थिए ।
एसोसिएसनका महासचिव पदमबहादुर आले मगरले साउन १५ को सांस्कृतिक र कृषिपरक महत्वलाई उजागर गर्ने खीर खाने पर्वले पवित्र र उत्सवले उत्साहित बनाउने भएकोले कार्यक्रम आयोजना गरिएको जानकारी दिए ।
कार्यक्रममा उपस्थितहरूले सामुहिक खीर, सेलरोटी लगायतका परिकारहरू खाएर कार्यक्रमको समापन गरिएको थियो।
