काठमाडौ, आइसिसी यू–१९ विश्वकपका लागि दक्षिण अफ्रिकामा रहेको नेपाली युवा टिमले दोस्रो औपचारिक वार्मअप म्याच आज टेस्ट टिम वेस्ट इण्डिजविरुद्ध खेल्दैछ ।
नेपाल र वेस्ट इण्डिजबीचको खेल नेपाली समयअनुसार मंगलबार दिउँसो १ः४५ देखि जोहान्सवर्गमा सुरु हुनेछ ।
दुवै टिम वार्मअप खेलमा लगातार दोस्रो जीत निकाल्न चाहन्छन् । नेपालले पहिलो वार्मअप खेलमा स्कटल्याण्डलाई डकवर्थ लुईस पद्धतिअनुसार ७ विकेटले हराएको थियो ।
त्यसअघि नेपालले अनौपचारिक अभ्यास खेलमा स्कटल्याण्डलाई १३५ तथा नामिबियालाई ६ रनले हरायो ।
यता वेस्ट इण्डिजले आइतबार भएको पहिलो वार्मअप खेलमा न्यूजील्याण्डलाई ६ विकेटले हराएको थियो ।
सो खेलमा न्यूजील्याण्डले दिएको १३२ रनको लक्ष्य वेस्ट इण्डिजले २४.५ ओभरमा ४ विकेट गुमाएर पूरा गर्यो । ऊ नेपालविरुद्ध पनि सहज जित निकाल्न चाहन्छ ।
विगतमा पनि वेस्ट इण्डिजले नेपालविरुद्ध उत्कृष्ट प्रदर्शन गरेको रेकर्ड छ । नेपाल र वेस्ट इण्डिजले उमेर समूहको क्रिकेटमा हालसम्म एक खेलमा मात्र प्रतिस्पर्धा गरेका छन् ।
यी दुई टिमले पहिलोपटक १ मार्च सन् २००८ को यू–१९ विश्वकपको प्लेट फाइनलमा एकअर्काको सामना गरेका थिए । सो खेलमा वेस्ट इण्डिजसँग नेपाल ७ विकेटले पराजित भयो ।
मलेसियाको कुवलालम्पुरस्थित बायुमास ओभलमा टस जितेर ब्याटिङ रोजेको नेपाल २५.३ ओभरमा ७४ रनमै अलआउट भयो ।
सो खेलमा नेपालको कप्तानी पारस खड्काले सम्हालेका थिए । ७५ रनको सामान्य लक्ष्य वेस्ट इण्डिजले १४.२ ओभरमा ३ विकेटको क्षतिमा भेट्टायो ।
नेपाल वेस्टइण्डिजसँगको १६ वर्षअघिको हारको बदला मंगलबार लिन चाहन्छ ।
आउँदो शुक्रबारदेखि सुरु हुन लागेको विश्वकपमा वेस्ट इण्डिज समूह ‘बी’ मा छ । उसले ग्रुप स्टेजमा इंग्ल्याण्ड, दक्षिण अफ्रिका र स्कटल्याण्डसँग खेल्नेछ ।
समूह ‘डी’ मा रहेको नेपालले भने ग्रुप स्टेजमा तीन टेस्ट टिमलाई प्रतिद्वन्द्वी पाएको छ । नेपालले पहिलो खेलमा आइतबार न्यूजील्याण्डसँग खेल्ने तालिका छ ।
त्यसपछि नेपालले बुधबार पाकिस्तान तथा शुक्रबार अफगानिस्तानको सामना गर्नेछ । यू–१९ क्रिकेटमा नेपालले यी तीनै टिमलाई हराइसकेको इतिहास छ ।
